Plaasinkomste daal met 45 %

Die landbou se swak winsvertoning die afgelope drie jaar het kommersiële boere genoop om hul plaaswerkers te verminder in ooreenstemming met groter winsgewendheid en die landbou se dalende bydrae tot die land se bruto binnelandse produk (BBP).

Die netto plaasinkomste het byvoorbeeld met 45 % gedaal, het dr. Japie Jacobs van die Land Bank se afdeling landbou-ekonomiese navorsing op die kongres gesê.

Hoewel die landbou se bydrae tot die BBP tot 3 % gedaal het, word dié sektor steeds as een van die sleutels tot die groei van die Suid-Afrikaanse ekonomie beskou.

Daar is nou 46 000 kommersiële boere. Hulle verskaf werk aan 941 000 mense. Altesame ses miljoen mense maak 'n bestaan uit die landbou.

Volgens die Wêreldbank sal Suid-Afrika se bevolking weens vigs teen 2020 tot 43 miljoen daal (dit is nou 47,2 miljoen), terwyl dit sonder die uitwerking van vigs op 65 miljoen sou staan. Dit sal die land se groeikoers en groei in die plaaslike vraag na landbouprodukte raak en die landbou dwing om meer uitvoergerig te word.

Jacobs sê die suiker-, wol-, sagtevrugte-, sitrus- en wynbedryf is uitvoergerig en ervaar groot mededinging op hul tradisionele uitvoermarkte, onder meer weens surplus internasionale produksie.

Varkvleis word die meeste in die wêreld geproduseer en verbruik (39 % van al die vleis), gevolg deur hoender- (30 %), bees- (24 %) en skaapvleis (3 %). In Suid-Afrika word witvleis die meeste geproduseer (48 %), gevolg deur beesvleis (39 %), varkvleis (7 %) en skaap- en bokvleis (6 %). Witvleis word ook die meeste verbruik (22,7 kg per persoon per jaar), gevolg deur beesvleis (16,4 kg), varkvleis (3,3 kg) en skaapvleis (3,2 kg).

Daar is dus genoeg ruimte in Suid-Afrika om die produksie en verbruik van varkvleis te vermeerder.

22 September 2006