Plant minder sorghum, vra GSA

Boere wat gewoonlik sorghum plant, moet vanjaar nóg minder van dié gewas plant as wat voorheen aanbeveel is. Hulle moet nou net 87 000 hektaar plant — nie 93 000 hektaar soos vroeër deur Graan SA aanbeveel is nie.

Mnr. Koos du Plessis, voorsitter van die sorghumwerkgroep van Graan SA, het op Bothaville gesê dié nuwe aanbeveling volg nadat dit blyk dat 346 000 ton sorghum reeds teen einde Julie gelewer is, terwyl daar volgens die sewende oesskatting van die Oesskattingskomitee op 20 Augustus 'n oes van 317 000 ton verwag word. Daar is dus al 9 % méér as die oesskatting gelewer.

Du Plessis sê die binnelandse vraag na sorghum is net sowat 251 000 ton. Volgens Graan SA se jongste ontleding van die vraag en aanbod kan die oordragvoorraad sowat 65 000 ton meer wees as wat nodig is.

Volgens die Suid-Afrikaanse Graan-inligtingsdiens is teen einde Julie vanjaar reeds 41 000 ton bittersorghum gelewer. Dit beteken dat die oordragvoorraad van dié sorghum genoeg behoort te wees tot die volgende seisoen om in die vraag te kan voorsien. Boere behoort dus geen bittersorghum vanjaar te plant nie.

Du Plessis het boere gemaan om in hul produksiebeplanning net daardie sorghumkultivars te plant wat aan die bedryf se vereistes voldoen.

1 Oktober 2004