Pluimveeboere kom bymekaar

Meer as 1 300 verteenwoordigers uit die pluimveebedryf word verwag by die Suider-Afrikaanse Pluimveevereniging (SAPV) se Avi-Afrika-pluimvee-ekspo, wat van 21 tot 23 April by die Emperor`s Palace aangebied word.

Mnr. Kevin Lovell, uitvoerende hoof van SAPV, sê dit is Afrika se spoggeleentheid vir pluimveeprodusente en tydens die geleentheid kan uitstallers hul nuutste produkte, tegnologie en vaardighede vertoon. Die ekspo sal amptelik om 14:30 op 21 April deur mnr. Willie Maree, voorsitter van die SAPV-bestuurskomitee, geopen word.

Van die aanbiedinge op 22 April sluit praatjies in oor die pluimvee-wêreld van vandag deur mnr. Gordon Butland van Aviagen en vryloop-pluimvee deur dr. David Allwright van die Eikenhof-pluimveeplaas.

Op die laaste dag van die ekspo is die gasprekers onder meer, mnr. Rudolf Gouws, hoofekonoom van Rand-Aksepbank, en 'n Sweedse kenner van pluimveemiddels, mnr. Mickael Rouault van Biomin. Die koste vir die volle drie dae is R940,50 en vir dagbesoekers is dit R324,90.

10 Februarie 2009