Cliffed onttrek uit BSV

Cliffed van Boer soek 'n Vrou. Foto: VERSKAF

Toe hy ’n paar maande gelede die inskrywingsvorm vir Boer soek ’n Vrou 4 wat sy suster hom gebring het, onderteken het, het Cliffed nooit verwag die liefde sal hom uit so ’n onverwagse hoek bekruip nie.

Cliffed het Donderdagaand, in die tweede episode, vir die eerste kinkel van die reeks gesorg toe hy vir Angelique vertel het hy sien nie meer kans om aan die program deel te neem nie.

Die rede vir dié drastiese stap is ’n ou liefde wat weer opgevlam het.  Cliffed vertel hy en Therese het sowat sewe jaar gelede uitgegaan, maar die verhouding het op die rotse beland toe sy gaan swot het en die lang afstand sy tol geeis het.

“Sy het in Johannesburg kom werk en weer in my lewe gekom,” vertel Cliffed oor hul herontmoeting. Ons het nou besluit om die verhouding weer ’n go te gee en ek moes my toe aan Boer soek ’n Vrou onttrek.”

Sy suster het hom aanvanklik aangemoedig om vir Boer soek ’n Vrou in te skryf, en hy het dit as ’n kans gesien om nuwe mense te ontmoet.

“As ek iemand spesiaal sou ontmoet, sou dit ’n bonus gewees het, maar ek het om die regte redes ingeskryf.”

En toe ontmoet hy haar – net uit ’n ander oord as wat hy gedink het. Dit is dus net omstandighede – gelukkig darem goeie omstandighede – wat hom laat besluit het om hom aan Boer soek ’n Vrou te onttrek.

“Noem dit ironie, noem dit toeval. Jy kan dit eintlik noem wat jy wil. Dis nie iets wat ek beplan het nie, dit het net gebeur. Ek is gelukkig en ons gaan vorentoe,” straal hy.

Hy sê hy is nie een oomblik spyt dinge het so uitgewerk nie.

“Ek is nie spyt ek neem nie meer deel nie. Dit gaan nie vir my oor bemarking, sosialisering of sulke goed nie. Ek is gelukkig in my persoonlike lewe, en dit is al wat belangrik is!”

9 September 2011