Dis nie aldag maklik vir ’n man wat op ’n verafgeleë plaas woon, om ’n vrou te vind nie – die plaas hou hom besig, die gemeenskap dans nie meer saam in die boeresaal nie en boonop is brandstof deesdae so duur dat ’n boer twee keer dink voordat hy stad toe ry.
Moderne boere, soos Tickey van Wyk (Loxton), Erik Roux (Robertson) en Gert Conradie (Robertson), het die kans aangegryp wat kykNET en Landbouweekblad hulle bied om ’n vrou te vind deur die werklikheidsreeks Boer soek ’n Vrou.
Nie een van dié boere kyk vandag terug nie. Al drie is gelukkig getroud met vroue wat vir hulle ’n briefie in die pos gegooi het nadat die boere hul harte op televisie vinniger laat klop het.
Gewilde aanbieder
Angelique Gerber sal vanjaar weer die aanbiederskoene volstaan. Dié aktrise studeer ook sielkunde. Sy is daarom altyd gereed met ’n woordjie van aanmoediging of troos. Sy is vol vuur vir die reeks wat voorlê en sien uit daarna om die boere te ontmoet wat vanjaar deelneem.
Gert, ’n wingerd-en-vrugteboer, loop steeds met ’n breë glimlag rond sedert hy en sy televisieliefde Maritza op 16 Desember afgehaak het. Maritza het verlede jaar in die vierde reeks Gert se voete onder hom uitgeslaan. “Ons is nog heel gelukkig! Daar is darem geen nukke nie,” vertel hy oor die telefoon. Voor Maritza het Gert nooit die regte vrou ontmoet nie.
Toe hy vir Boer soek ’n Vrou inskryf, was dit werklik sy hartsbegeerte om ’n lewensmaat te vind. “Jy soek na iemand, maar kry ook nie altyd baie tyd nie en die vrou kom net nie oor jou pad nie,” vertel hy oor sy besluit om aan die program deel te neem.
'n Heerlike ervaring
Die wonderlikste was natuurlik sy vroutjie, wat nou as aptekersassistent op Worcester werk, maar Gert sê daar was baie hoogtepunte toe hy aan die reeks deelgeneem het. “Dit was veral lekker om die ander boere te ontmoet. Jy kom agter daar is baie mense wat dieselfde soek as wat jy soek.”
Boere van oor die hele land en in allerlei landbouvertakkings neem aan die reeks deel. Soos ’n boer nou maar een maal is, hou hy daarvan om met ander boere oor sy boerdery te gesels. Die reeks is ’n gulde geleentheid om nuwe landbouvriende of selfs nuwe vriendinne te maak.
“ ’n Boer is mos maar trots op wat hy doen en dit is ’n lekker proses om te kan wys wat hy doen en wat op die plaas aangaan.” Selfs al ontmoet hulle nie ’n lewensmaat nie, sal Gert steeds boere aanmoedig om vir die reeks in te skryf.
Die regte redes
“Die boere moet dit egter om die regte redes doen, en nie net vir die kans om op televisie te verskyn of vir die ervaring nie. Moenie net vir die grap inskryf nie, maar skryf in omdat jy werklik iemand soek,” is sy raad. “Jy moet opreg wees, en van dag een af reguit wees oor wat jy wil hê.
"Moenie voorgee om iets te wees wat jy nie is nie. Jy moet ook eerlik wees met die ander mense.” Hy glo die reeks stel verbruikers en gewone Suid-Afrikaners op ’n opwindende manier aan die landbou bloot en gee hulle ’n kykie na waar hul kos vandaan kom.
“Baie van die vroue kom van die stad af en het nie ’n idee wat op ’n plaas gebeur nie. Hulle dink dit is net maanskyn en rose, maar dit is nie altyd so nie.” Gelukkig pas Maritza baie goed op die plaas aan. “Sy doen haar eie werk, maar haar belangstelling in die plaas is daar,” vertel Gert oor sy vrou.
'Wees net jouself'
Dit is ook nie net ekstroverte wat vir die reeks behoort in te skryf nie. “Ek is glad nie so nie. Ek is eintlik ’n introvert en hou baie goed maar taamlik terug. So, selfs ’n skaam ou kan inskryf. Wees net jouself,” meen hy. Hy en Maritza sien baie uit na die vyfde reeks en sal dit beslis volg.
“Ek wil graag sien wat vanjaar gaan gebeur. Verlede jaar het ons mos geweet wat gaan gebeur, maar nou sal ons saam met die ander mense moet wonder wat volgende gaan gebeur. Hierdie keer sal ons darem ’n idee hê van hoe die boere voel en wat hulle dink!”
As jy nie wil inskryf nie, maar nie kan wag om die naelbyt-aksie en liefdesintrige op die kassie te volg nie, kan jy maar die slapies begin tel tot 27 September wanneer die reeks begin.
* Die inskryfvorm vir boere wat aan Boer soek 'n Vrou wil deelneem is by dié artikel aangeheg.
29 Maart 2012
