Ontmoet Bas

Bas (30) is ’n blomboer van Hartebeespoortdam. Foto: VERSKAF

Bas (30) is ’n blomboer van Hartebeespoortdam. Die vrou wat sy hart wen, kan dus verwag om baie blomme te kry!

Waarom het jy vir Boer soek ’n Vrou ingeskryf?

My vriende het my ingeskryf. Ag, ek het gedog dit kan net ‘‘fun’’ wees en miskien kry ek ook ’n vrou hieruit. En ’n mens ontmoet nuwe mense. Ek geniet dit al klaar baie.

Wat maak van jou goeie kêrel-materiaal?

Ek sal haar goed behandel. Ek is ’n vriendelike ou met wie dit lekker is om te kuier. Natuurlik gaan ek haar bederf en dis vanselfsprekend dat ek baie liefde gaan gee. Ag, dit is nooit vir my lekker om sulke goed oor myself te sê nie.

Wat verwag jy moet ’n vrou op die plaas doen?

Daar is geen rol nie. Ek hou nogal daarvan as ’n vrou selfstandig is. Dit sal lekker wees as ek saans by die huis kom om nie net oor die plaas en die boerdery te gesels nie, maar ook oor wat sy gedoen het.

Hoe lyk jou ideale vrou?

Sy het ’n kombinasie van persoonlikheid en aantreklikheid. Ag, ek is nie spesifiek oor hoe sy moet lyk nie. Sy kan blond wees. Sy kan ’n brunette wees. Dit maak nie saak nie, solank ek aangetrokke tot haar is. Sy moet ’n ‘‘bubbly’’ persoonlikheid hê en daarvan hou om te gesels.

Wat is die mees romantiese ding wat jy al gedoen het?

Uiteet, blomme gestuur, sulke goed. Ek is in ’n mate ’n romantiese ou, maar ek is nie elke dag in daardie bui nie. Van tyd tot tyd moet ’n mens seker romanties wees.

19 Mei 2011