Ontmoet Pierre

Pierre (25) is ’n wyn-en-melkboer van Worcester. Foto: VERSKAF

Pierre (25) is ’n wyn-en-melkboer van Worcester en ’n ywerige avonturier wat gek is na sport. Hy speel tennis, klim berg, ry bergfiets en motorfiets, hou van rubberbote en is lief vir vlieërplankry. 

Hoekom het jy vir Boer soek ’n Vrou ingeskryf?

Dit was eintlik my ma wat my ingeskryf het. Aanvanklik het ek my ’n bietjie teengesit, maar op die ou end het ek gedink dit kan pret wees en het ek my toestemming gegee.

Ek was eers ’n bietjie skrikkerig, maar nou lyk dit asof dit lekker gaan wees. Ek is nog baie jonk. Ek gaan dus net om dit te geniet en om nuwe vriendinne te maak. En ek sal maar kyk, dalk ontmoet ek ook die regte een.
 
Wat maak van jou goeie kêrel-materiaal?

Ek sal ’n maklike kêrel wees en sy sal nie met my hoef te sukkel nie. Ek sal haar, byvoorbeeld, nie by die huis los en saam met my pêlle gaan kuier nie. Ons sal ook lekker goed saam kan doen, want ek is lief vir avontuur en ons kan in die veld saam gaan stap. Ek is bereid om baie tyd saam met haar deur te bring.

Wat kan vroue van die lewe op die plaas verwag?

Ek en my broer gaan eendag saam boer. As my vrou by die boerdery betrokke wil raak, kan ons haar seker betrek. Ons bly naby Worcester, wat ’n groot dorp is. Sy behoort dus ook in enige rigting wat sy wil te kan werk.

Wat dink jy sal jou oog vang in ’n brief?

Foto’s, en sy moet haar agtergrond goed beskryf sodat ek verseker weet hoe sy lyk en hoe sy is. Versierinkies gaan my nou nie help om te kies nie. Ek gaan beslis al die briewe lees. Ek sal ook nie dat iemand anders dit lees en vir my besluit nie.

Vertel ons iets van jouself wat niemand anders weet nie.

Ek sal daaroor na jou toe moet terugkom!

16 Mei 2011