Helfte van wapenlisensies geweier

Vuurwapen. Foto: THEUNS BOTHA

Tot 50% van aansoeke vir vuurwapenlisensies word geweier, en sommige wildbewaarders wag al vyf jaar vir hulle lisensies. 

Luidens ‘n verklaring van Wapeneienaars Suid-Afrika is hulle baie bekommerd omdat aansoeke van persone, wat bevoeg verklaar word en wel aan die voorgeskrewe voorwaardes voldoen, geweier word.

Die organisasie sê hoewel mnr. Nathi Mthethwa, Minister van Polisie, in November verlede jaar erken het dat die toepassing van die Wapenbeheerwet ‘n mislukking is, het hy tot dusver nog nie ‘n omkeerplan bekend gemaak om aan die publiek te verduidelik wat gedoen gaan word aan die probleme en die groot agterstand nie.

Mthethwa word ook gekritiseer omdat hy nog nie ‘n verslag oor die werking van die Sentrale Wapenregister bekend gemaak het en verduidelik het wat in die proses skort en wat dit die land gekos het om die proses te implementeer nie.

Hofsake?

Volgens die organisasie is hulle, in samewerking met ander verenigings wat wapeneienaars in die land verteenwoordig, van plan om volgens die regstelsel teen Mthethwa op te tree oor veranderinge aan die Wapenwet en dít wat nie behoorlik geïmplementeer word nie.

Intussen sê mnr. Pelham Jones, voorsitter van die Private Renostereienaarsvereniging, eienaars van dié diere asook reservate wat die groot vyf huisves, sukkel ook steeds om hulle lisensiekopsere op te los.

Gedwing tot onwettige optrede

Tydens Minister Bulyewa Sonjica se Renosterberaad wat in 2010 plaasgevind het, het Jones aan die Regering, Polisie en alle betrokke rolspelers uitgewys dat sommige wildbewaarders, weens die sloerdery met lisensies, renosterstropers met knuppels en pepersproei moes beveg. Jones wag self sedert 2006 vir die toekenning van sy bewaarders se lisensies, wat reeds goedgekeur is. Die Polisie het daar onderneem om die situasie spoedig aan te spreek, maar Jones sê ses maande later het hy steeds niks gehoor nie.

Jones sê tans word verskeie bewaarders gedwing om onwettig op te tree want die wet vereis dat ‘n bewaarder, wat alleen of met besoekers, in enige reservaat beweeg waar die groot vyf aangehou word, ‘n wapen byderhand moet hê. “Effektief gaan bewaarders tans onwettig die veld in.”

18 Februarie 2011