Klassifikasie pla jagters

Die Suid-Afrikaanse Jagters en Wildbewaringsvereniging (SAJWV) is ongelukkig oor 'n onlangse studie waarin jagters hoofsaaklik as "jagters ter wille van biltong, sport of ontspanning" geklassifiseer word.

"Jag is 'n eiesoortige natuurbelewenis wat uit vele fasette bestaan. Daarom kan jagters nie met behulp van 'n keusevraelys in kassies geplaas word nie," het dr. Herman Els, bestuurder van bewaringskoördinering by die SAJWV, gesê.

Hy het op die vereniging se jaarlikse jagtersfees in Pretoria gesê in 'n onlangse studie van die instituut vir toerisme, natuurlewe-ekonomie en vryetydstudies aan die Noordwes-Universiteit is vraelyste aan jagters gestuur waarin hulle 'n keuse van redes gegee is vir hul deelname aan jagbedrywighede. Die keuses was vleis (biltongjag), trofee, sosialisering, ontspanning en ander.

Vraelyste is aan 10 000 lede van jagverenigings gestuur en 676 het geantwoord. Hiervan het 37% biltong as rede gegee, 28% vryetydsbesteding, 15% sosialisering en 10% trofeejag.

"Die keusemoontlikhede is nie die keuse van jagters nie, maar die versinnebeelding van die navorsers oor wat hulle verstaan (of misverstaan) van jag." Hy sê die SAJWV wil graag die misverstande en wanvoorstelling van redes vir deelname aan
jag uit die weg ruim.

"Dit is nie waardes wat deur 'n vraelys met 'n paar keuses nagevors kan word nie. Biltong of ontspanning mag dalk deel daarvan wees, maar dit gaan oor veel meer " 'n hele belewenis wat moeilik is om te artikuleer. Natuurbewaring is deel daarvan. Jagters was ook die eerste mense wat bewaring toegepas het," het Els gesê.

Landbouweekblad, 3 Oktober 2008