Oorwinning vir wapeneienaars

Foto: www.wwallpapersweb.com

Suid-Afrikaanse vuurwapeneienaars wat sedert 2004 hul vuurwapens vrywillig by die Suid-Afrikaanse Polisiediens (SAPD) ingelewer het, kan uiteindelik betaling verwag, sê die Geregtigheidsalliansie van Suid-Afrika (Jasa). Dít kom ná ’n beslissing van regter Jeanette Traverso in die Kaapse Hooggeregshof.

Volgens dié beslissing het mnr. Nathi Mthethwa, Minister van Veiligheid en Sekuriteit, drie maande om riglyne te ontwikkel vir die betaling van vergoeding aan vuurwapeneienaars wat hul vuurwapens vrywillig ingelewer het. Die Wet op die Beheer van Vuurwapens bepaal dat vuurwapeneienaars aansoek kan doen om vergoeding as hulle nie vir herlisensiëring van hul vuurwapens aansoek doen nie, of ’n lisensie geweier is.

Die beslissing volg ná ’n aansoek van Jasa en die Valsbaai-skietklub teen Mthethwa, die nasionale kommissaris van polisie, mnr. Bheki Cele, en die vuurwapen-appèlraad. Die aansoekers het gevra dat die minister riglyne saamstel vir die vergoeding van vuurwapeneienaars en voer aan dat die respondente nie hul wetlike verpligtinge nakom nie, wat ’n oortreding van die Grondwet is.

“Die bevel sê wat die afgelope vyf jaar gebeur het, is onwettig en ongrondwetlik,” sê adv. John Smythe van Jasa. Mnr. Martin Hood, die Suid-Afrikaanse Vereniging van Wapeneienaars (Saga) se regsadviseur, meen die beslissing moes gevel gewees het en is “net die oortjies van die seekoei”, luidens ’n berig in Die Burger. “Die wetgewing is onregverdig en die polisie kan nie die taak wat hulle opgelê is, uitvoer nie. Dit is die begin van baie hofsake wat gaan poog om dié wetgewing ter syde te stel,” sê hy.

Die Vryheidsfront Plus het die beslissing verwelkom.

Bron:
Die Burger
Wapeneienaars van Suid-Afrika
Vryheidsfront Plus

1 September 2009