Vuurwapens: Amnestie verleng

Vuurwapen. Foto: www.witness.co.za

Diegene wat in besit van onwettige vuurwapens is se amnestietydperk om dié wapens by die Suid-Afrikaanse Polisiediens (SAPD) in te handig, is met vier maande verleng. Wapens kan nou tot 11 April volgende jaar inhandig sonder vervolging, luidens ‘n berig op IOL.

Mnr. Nathi Mthethwa, Minister van Polisie, se voorstel vir die verlengde amnestietydperk is vandeesweek in die Parlement aanvaar. “Die amnestie verskaf ‘n werkswyse waar enige vuurwapen, wettig of onwettig, aan die polisie oorgegee kan word sonder vrese van vervolging,” sê mnr. Zweli Mnisi, woordvoerder vir die Ministerie van Polisie.

Hy sê onwettige vuurwapens kan by enige polisiestasie ingehandig word en die betrokke polisiebeampte moet ‘n kwitansie vir die wapen en alle bykomende ammunisie verskaf. Die wapens sal bymekaar gemaak word en volgens die regulasies vir die beheer van vuurwapens vernietig word. Die proses vir diegene wat gelisensieerde vuurwapens wil inhandig is egter nie dieselfde nie.

“Die meerderheid van rowe word met vuurwapens gepleeg terwyl ‘n groot aantal moorde met onwettige vuurwapens gepleeg word. Die vermindering van die hoeveelheid vuurwapens in sirkulasie is ‘n belangrike deel van die SAPD se strategie om geweldsmisdaad te bestry,” sê Mnisi.

Bron:
IOL

11 November 2009