Daai lekkerrr sous

Daar' dinge wat maar eenmaal bymekaar hoort - soos die regte sous by die regte kos. En doen jy 'n bietjie ekstra moeite in die sous-afdeling, is dit die maklikste manier om nuwe woema aan ou gunstelinge te gee.

Sjokolade-koffiesous

375 ml room

90 ml gouestroop

200 g donker sjokolade, gekap

5-10 ml kitskoffiepoeier

5 ml kaneel

Verhit alles stadig saam oor lae hitte tot glad. Bring tot kookpunt en prut tot die sous dik genoeg is om die agterkant van 'n lepel te bedek. Laat afkoel tot louwarm. Lewer ongeveer 500 ml sous.

Ryk sjokoladesous

200 g donker sjokolade (met of sonder neute), gekap

250 ml room

15 ml botter

Smelt die sjokolade en room stadig saam oor lae hitte tot gesmelt (jy kan dit ook teen 30 % krag in die mikrogolf doen). Roer tot glad en roer die botter by. Laat effens afkoel. Lewer ongeveer 375 ml sous.

Botterkaramelsous

Dit pas by byna enige nagereg, maar is uitstekend oor warm appel- of brandewyntert met 'n skeppie geklopte room.

125 ml witsuiker

125 ml botter

30 ml gouestroop

30 ml water

250 ml room

5 ml vanieljegeursel

Verhit die suiker, botter, stroop en water saam tot die suiker gesmelt is. Roer aanhoudend. Wanneer opgelos, voeg die room en geursel by. Verhit tot kookpunt en prut tot verdik en toffiekleurig.

Lewer ongeveer 375 ml sous.

Bessiesous

1 houer (500 g) gemengde, bevrore bessies

1 blik (450 g) bessiekonfyt

250 ml strooisuiker

125 ml water

60 ml bessielikeur (opsioneel)

Verhit die bessies, konfyt, strooisuiker en water stadig oor lae hitte tot die bessies ontdooi en die suiker gesmelt is. Verhit tot kookpunt en prut liggies vir ongeveer 10 minute tot stroperig. Laat effens afkoel , roer die likeur by en sit louwarm of teen kamertemperatuur voor by enigiets van wafels, Franse roosterbrood, sjokoladebruintjies, oor jogurt of saam met room in pannekoek. Lewer ongeveer 750 ml sous.

Tartaarsous met byt

250 ml mayonnaise van goeie gehalte

10 ml kappertjiesaad, gekap

30 ml vars suurlemoensap

15 ml peperwortelroom

10 ml Tobascosous

10 ml Cajun-speserye

Meng alles saam en sit voor met calamari of geroosterde vis.

Lewer ongeveer 310 ml sous.

Maklike braaisous vir hoender-, lams-, bees- of varkvleis.

250 ml tamatiesous

125 ml rooiwyn

60 ml sonneblomolie

60 ml sojasous

45-60 ml witasyn

15 ml mosterdpoeier

15 ml paprika

10 ml vars gemaalde swartpeper

10 ml fyn knoffel

20 ml droë oregano

Meng alles saam en smeer oor vleis voor dit gerooster of gebraai word. Andersins, kook alles saam vir 5 minute en laat afkoel voor gebruik. Die gekookte sous kan vir tot 'n week lank in die yskas hou.

Lewer ongeveer 500 ml sous.

Driekaassous

30 ml botter

30 ml koekmeel

2 ml mosterdpoeier

500 ml volroommelk

60 ml gerasperde, beleë cheddar

25 g (kwart rolletjie) gekrummelde bokmelkkaas

60 ml gekrummelde bloukaas

Sout en witpeper na smaak

Smelt die botter en voeg die meel en mosterdpoeier by. Verhit tot kookpunt en laat borrel vir 'n paar sekondes. Voeg die melk bietjie vir bietjie by en verhit, terwyl geroer word, tot kookpunt. Prut liggies tot gaar (die sous moet net effens verdik wees). Verwyder van die hitte en roer die drie kase by. Laat staan tot goed gesmelt, proe vir geur en sit 'n bietjie sout en witpeper by, indien nodig. Sit voor op blomkool of broccoli, kaasburgers, steak, gebruik as fonduesous vir geroosterde blokkies brood of giet oor gaar skelvisfilette en druk vinnig onder 'n warm oondrooster.

Lewer ongeveer 500 ml sous.

Heuningmosterd-roomsous

Oor 'n gebraaide varkfilet wat met bloukaas gestop is, kry jy nie lekkerder nie.

250 ml room

10 ml heelkorrelmosterd

5 ml heuning

Sout en peper na smaak

Verhit alles saam tot kookpunt en kook af tot die sous verdik is. Geur met sout en peper en sit voor met varkvleis.

Lewer ongeveer 180 ml sous.

Landbouweekblad, 17 November 2006.