Eenpot etes

Moeg vir jou gewone resepte vir aandete? Probeer een van dié maklike disse - dis ideaal vir die herfstyd wanneer 'n mens lus is vir iets warms.

Hoenderkasserol

1,2 kg hoenderporsies

Sout en peper na smaak

30 ml olyfolie

1 ui, gekap

4 knoffelhuisies, fyn gedruk

750 ml hoenderaftreksel

375 ml langkorrel-witrys

1 blik (410 g) kekerertjies, gedreineer

60 ml suurlemoensap

60 ml vars koljander, grof gekap

15 ml paprika

15 ml vars oreganum

Ekstra vars koljander

Geur die hoender met sout en peper. Verhit die olie in 'n swaarboompot en braai die hoender daarin bruin. Voeg die ui en knoffel by en braai verder tot sag. Voeg die aftreksel, rys, kekerertjies, suurlemoensap, koljander, paprika en oreganum by. Bedek en prut tot ál die vloeistof geabsorbeer is. Geur na smaak, bedek vir nog 'n paar minute en roer 'n handvol gekapte vars koljander deur.

Sit voor met 'n slaai of twee. Genoeg vir agt tot tien mense.

Varkworsiekasserol

30 ml botter

30 ml olyfolie

500 g varkworsies

250 ml eiervrugblokkies, met sout besprinkel

250 ml murgpampoentjieblokkies

1 rooi soetrissie, in blokkies gesny

1 groen soetrissie, in blokkies gesny

1 ui, gekap

3 knoffelhuisies, gekap

2 blikke (410 g) gekapte tamaties met basielkruid

45 ml gekapte pietersielie

Sout, peper en suiker na smaak

Verhit die botter en olie in in 'n swaarboompot. Druk die worsvleis uit die worsderms en braai tot gaar. Breek die stukkies met 'n houtlepel op terwyl dit gebraai word. Spoel die eiervrug onder koue water af en druk droog. Voeg dit saam met die murpampoentjies, soetrissieblokkies, ui en knoffel by die worsvleis. Braai vir ongeveer 7 minute tot gaar. Voeg die tamaties, pietersielie en geurmiddels na smaak by. Prut liggies vir nog 7 minute. Sit voor op rys of koeskoes. Genoeg vir ses tot agt mense.

Varkvleis in kola

Jare terug was daar 'n gier om vleis in gaskoeldrank gaar te maak - as ek moet raai, was dit waarskynklik die Amerikaners se antwoord op die lekker Ierse bredies wat bier in kry. Ek is nie 'n groot voorstander van kook met koeldrank nie, maar ek moet toegee - dié resep het ons almal verbaas. Dit proe eg Oosters.

15 ml olie

1 ui, gekap

4 knoffelhuisies, fyn gedruk

900 g ontbeende varkribbetjies, in blokkies gesny

500 ml kola-koeldrank

2 ekstra knoffelhuisies, fyn gedruk

45 ml sojasous

45 ml gerasperde, vars gemmer

6-8 grasuie, gekap

Sout en peper na smaak

Ekstra vars grasuie, gekap

Verhit die olie in 'n groot swaarboompot en braai die ui en knoffel liggies daarin tot gaar. Voeg die vleisblokkies by en braai tot goudbruin. Voeg die kola-koeldrank by en verhit tot kookpunt. Bedek en prut liggies vir 30 minute. Meng die knoffel, sojasous, gemmer en grasuie en voeg by die varkvleis. Bedek weer en prut vir 'n verdere uur. Haal die deksel af en prut tot die sous effens afgekook is. Roer grasuie deur en sit voor op Basmati-rys.

Genoeg vir vier tot ses mense.

12 Mei 2006