Hoender - ekonomies en sakpas vir die kok

Ons hoendergeregte is maklik om te maak met bestanddele wat jy gewoonlik in die kas het.




Hoender met appel




Appels en appelsider gee 'n pikante smaak aan die vleis.

200 g botter

1,2 kg hoenderstukke

850 ml appelsider

6 kookappels, ontpit en in skywe gesny

250 ml vars room

45 ml vars gekapte pietersielie



Smelt sowat helfte van die botter in 'n pan en braai hoenderstukke aan weerskante tot goudbruin. Giet die sider by en verlaag hitte. Kook tot vleis gaar is. Smelt intussen die orige botter in 'n ander pan en braai die appelskywe daarin. Haal appelstukke uit pan en dreineer op kombuispapier. Haal hoenderstukke uit pan en plaas in 'n opdienbord. Skep appelstukke by en hou warm.

Roer die room en pietersielie in die sider-mengsel. Roer deur, geur en giet oor hoender en appels.

Dien op met rys en groente.

** Wenk: Pleks van appelsider, kan jy dieselfde hoeveelheid appelsap
gebruik.

Hoender met kruiedeeg



Ons het hoenderstukke gebruik, maar 'n heel hoender sal eintlik lekkerder wees.

1,5 kg heel hoender of hoenderstukke

45 ml gekapte, vars pietersielie

5 tot 10 ml gedroogde tiemie

5 tot 10 ml gedroogde dragon

45 ml heel korrelmosterd

30 ml sagte botter

30 ml koekmeel



Stel die oond op 180 °C. Plaas hoender in oondpan. Maak 'n pasta van die res van die bestanddele en smeer oor hoender. Bedek liggies met tinfoelie. Bak in voorverhitte oond vir sowat een uur. Verwyder foelie en bak nog sowat 35 minute of tot gaar. Dien op met gebraaide aartappels.

5 Julie 2002