Koppie-en-pieringkolwyntjies

Vir basiese kolwyntjies: Voorverhit die oond tot 200 °C en voer ’n muffinpan met papiervormpies uit. Verroom botter en strooisuiker goed. Voeg vanieljegeurseleneier byenklits deur.Voubruismeel en melk by belag in.

Maak papiervormpies driekwart vol met beslag en bak vir 12-15 minute, tot liggoudbruin en gaar. Haal uit pan en laat op draadrak afkoel (anders trek papiervormpies los). Lewer 12 standaardgrootte en 24 mini-kolwyntjies. Wenk: Soek vir mini-muffinpanne by supermarkte of bakwinkels.

Vir basiese botterversiersel: Verroom botter of margarien en versiersuiker saam. Klits vanieljegeursel en kookwater of melk by om smeerbare versiersel te kry. Hou aan klits tot lig en romerig. Voeg kleursel by, soos verkies. Lewer 500ml.

Vir koppies en pierings: Smeer elke Mariebeskuitjie met ’n lagie ligpienk botterversiersel. Skep donkerpienk botterversiersel in spuitsak met dun punt (of gebruik plastiek-toebroodjiesakkie en knip ’n klein puntjie af). Spuit ’n dun randjie om die kant van elke Mariebeskuitjie. Smeer al die kolwyntjies met ’n lagie ligpienk botterversiersel en spuit ’n dubbele rand rondom elkeen met donkerpienk botterversiersel.

Skep ’n klein bietjie aarbeikonfyt bo-op elkeen. Sit versierde kolwyntjie in die middel van die Marie-piering neer. Knip elke pypskoonmaker in drie ewe groot stukke en buig om soos ’n koppie se oor te lyk. Druk in kolwyntjie vas, soos op die foto.

Lewer 24 koppie-en-piering-kolwyntjies.

Landbouweekblad, 27 Augustus 2010