Lentekos op Weltevrede

Tydens die vroueklub-dag van die wynlandgoed
Weltevrede het Freda Rossouw van Bonnievale middagete voorberei. Ons deel graag
met ons lesers 'n paar van haar lekker resepte.






Tunamousse


Maak dit al die vorige dag en hou in die yskas.



3 blikkies (185 g elk) tuna in pekel

150 ml mayonnaise

15 ml suurlemoensap

200 ml room, styf geklits

30 ml gekapte pietersielie

3 sprietuie, fyn opgekap

sout en peper na smaak

25 ml gelatien

75 ml water



Dreineer tuna en maak fyn saam met mayonnaise en suurlemoensap of plaas in voedselverwerker. Vou room, pietersielie, uie, sout en peper in. Spons gelatien oor water en laat oplos oor warm water of in mikrogolfoond. Meng goed met tunamengsel.

Skep in gesmeerde broodpan van 12 x 22,5 x 7 cm. Bedek en laat stol in yskas.

Keer uit op opdienbord. Dien op in skywe saam met Franse brood.

Hoender met pruimedante en koffie


Dié interessante kombinasie van droëvrugte en baie sterk koffie saam met Port gee 'n besondere geur aan die vleis.



16 hoenderporsies

appelkooskonfyt

sout en peper na smaak

kruie soos roosmaryn en tiemie

500 ml droë wit wyn



Sous

60 ml elk botter en olyfolie

16 vars piekeluitjies

15 ml vars tiemie

250 ml Port

500 ml sterk koffie

24 ontpitte pruimedante

sout en peper

15 ml mielieblom

30 ml water



Stel oond op 200 °C. Plaas hoender in oondpan en smeer appelkooskonfyt bo-oor. Geur vleis en en sprinkel kruie oor. Giet wyn in oondpan en bak vleis tot gaar en goudbruin. Bedruip gereeld (hou dop vir aanbrand en bedek, indien nodig).

Vir die sous: Verhit botter en olyfolie en soteer uitjies. Voeg tiemie, Port en koffie by en bring tot kookpunt. Voeg pruimedante by en prut onbedek vir 20 min. Maak mielieblom met water aan tot 'n pasta. Roer by sous tot verdik.

Sit hoender voor op koeskoes saam met warm sous.

Dien op saam met tamatie-uiemengsel (resep volg), koeskoes en groente.

Tamatie-uie-mengsel


Dis 'n redelike groot hoeveelheid, maar jy kan dit altyd in die yskas bêre of vries vir 'n volgende keer.



1 kg uie, fyn opgekap

500 ml wit asyn

2 kg ryp tamaties, ontvel

1 kg suiker

30 ml kerriepoeier

30 ml mosterdpoeier

5 ml rooipeper

30 ml mielieblom

sout na smaak



Kook uie in asyn tot sag en voeg res van bestanddele, behalwe mielieblom, by.

Kook tot sag. Maak die mielieblom met 'n bietjie koue water aan, roer by die mengsel in kastrol en laat weer kook. Voeg die sout by. Wanneer gaar en verlangende dikte bereik is, verwyder van hitte en hou warm tot benodig.




Lemoenfudge


Daar moet 'n poeding wees om dié heerlike ete mee af te sluit. Die likeur gee 'n pikante smaak hieraan.



200 ml lemoensap

50 ml Van der Hum-likeur

1 pakkie (125 g) vingerbeskuitjies

200 g wit melksjokolade

gerasperde lemoenskil

125 ml room

30 ml botter

10 ml gelatien

45 ml water

250 ml ekstra room

5 ml vanieljegeursel

2 eierwitte

50 ml strooisuiker



Meng lemoensap en likeur, doop al die beskuitjies hierin en rangskik op die bodem van 'n bak van sowat 27 x 18 cm.

Smelt sjokolade, lemoenskil, 125 ml room en botter oor kokende water of in die mikrogolfoond. Spons gelatien oor water en laat oplos oor kokende water of mikrogolf. Roer in by sjokolademengsel. Laat afkoel, maar wees versigtig dat dit nie stol nie. Klop room styf met geursel en vou by sjokolademengsel.

Klits eierwitte saam met strooisuiker tot styf en vou in by sjokolademengsel. Skep op vingerbeskuitjies. Plaas in yskas.



Wenk: Freda het wit sjokolade gebruik, maar ons het gevind bruin sjokolade werk net so lekker.