Net vir Pa

Planne met boksies

Boksies maak altyd 'n mooi geskenkpakkie. Jy kan dit oortrek, verf of bloot net versier met 'n etiket om dit van gewoon tot spesiaal te omskep.

Verras pa vanjaar met 'n heerlike bederfboksie om byderhand te hou as hy rugby kyk. Vul dit met sy gunstelinglekkernye, soos kaaskoekies, droëwors, skyfies en 'n koue bier. Versier dit met stroke gekleurde papier vir 'n nuwe, vars effek. Doen dieselfde deur bloot lang stroke papier oor die rand van die boksie te plak in plaas van gewoon in die middel - en wissel die breedte van die stroke vir effek.

Nóg boksie-idees

Vou leë tee-bokse uitmekaar en trek dit oor met 'n mooi effekleurige geskenkpapier (gebruik sproeigom vir 'n netjiese afronding). Vou die boksie weer toe en plak of gom die sykante in posisie met alkantkleefband of sterk papiergom. Laat droog word, vul met sneespapier-knipsels en pak vol lekkernye. Skoendose kan ook só ingespan word.

Verf 'n boksie met 'n ligte kleur en skryf vir Pa 'n boodskap (of mooi gesegdes oor vaderskap) met 'n goue of silwer pen regoor die boksie. Knoop 'n bypassende koord losweg bo-oor en heg 'n etiket aan.

Voorverhit die oond tot 180 °C en voer 'n bakplaat uit met bakpapier. Meng die kase, meel, brandrissies en peper saam. Vryf die botter in tot dit soos growwe krummels lyk en voeg die water drupsgewys by. Maak aan tot 'n stywe deeg. Rol uit op 'n meelbestrooide oppervlak (of tussen twee velle waspapier) tot ongeveer 3-5 mm dik. Druk ronde sirkels uit en rangskik op die uitgevoerde bakplaat. Bak vir ongeveer 10 minute of tot die koekies goudbruin begin verkleur. Laat op die bakplaat afkoel en bêre in 'n lugdigte houer. Geniet met drankies of as versnapering.

Lewer ongeveer 30 koekies.

Speseryneute

15 ml botter
10 ml fyn komyn
3 ml koljander
10 ml growwe sout, effens fyn gestamp
10 ml paprika
5 ml droë brandrissies, fyn gemaal
750 ml gemengde neute

Voorverhit die oond tot 180 °C. Smelt die botter en voeg die komyn, koljander, sout, paprika en brandrissiepoeier by. Braai vir ongeveer 1 minuut. Voeg die neute by en braai tot al die neute met 'n lagie van die speserybotter bedek is. Krap uit op 'n bakplaat wat met foelie uitgevoer is. Bak vir 15 minute of tot goudbruin. Laat afkoel en bêre in 'n lugdigte houer, blikkie of glasfles met 'n styfpassende deksel.

Lewer 750 ml neute.

In 'n blik

Blikkies is ideaal om enigiets - van spesery en neute tot sjokolade en gekerfde biltong - in te verpak. Maak seker die blikkie sluit dig - verpak andersins jou geskenkie in 'n sakkie wat jy eers verseël voordat jy dit in die blikkie pak.

Maak só

Meet die omtrek en hoogte van jou blikkie en knip 'n lengte gekleurde waspapier om netjies rondom te pas. Plak 'n lengte alkantkleefband op elke punt (van bo tot onder) en plak die strook in posisie op die blikkie. Plaas die geskenkie daarin en druk die deksel op. Plak 'n lang, dun strook gekleurde papier (ook met alkantkleefband) bo-oor die blikkie om dit af te rond.

Nóg bli(n)k-idees

Geen mooi, nuwe blikkies nie? Was leë gouestroop-, spesery- of koffieblikkies (met plastiekdeksels) deeglik uit, droog af en plak 'n treffende etiket rondom.

Druk of skryf 'n spesiale boodskap op gekleurde papier en plak dít - in plaas van die gekleurde strook - rondom die blikkie.

17 Junie 2005