Piesang op vier maniere

Piesang-en-klapperpoeding

100 g botter

180 ml ligte bruinsuiker

3-4 piesangs

Skeut suurlemoensap

Bolaag

250 ml koekmeel

125 ml klapper

10 ml bakpoeier

80 ml suiker

Knippie sout

60 g botter

1 eier

180 ml melk

Voorverhit die oond tot 180 °C. Smelt botter en suiker saam in 'n pan en giet die mengsel in 'n oondbak van 20 cm x 30 cm. Skil piesangs en sny in lang repe. Pak bo-op die botter-en-suikermengsel en druk 'n bietjie vars suurlemoensap daaroor uit.

Vir die bolaag: Meng die droë bestanddele en vryf botter daarby in tot die mengsel soos growwe krummels lyk. Meng eier en melk, voeg by droë bestanddele en giet versigtig oor piesangs sodat dit egalig versprei is. Bak vir 35-45 minute tot liggoudbruin. Sit louwarm of teen kamertemperatuur voor met roomys of vla. Genoeg vir agt mense.

Vars piesangblatjang

Piesangblatjang is heerlik by Indiese disse of geregte met 'n tropiese geur. Jy kook dit in 'n kits. Kyk onderaan die resep vir 'n paar geregte waarby jy dit gerus kan voorsit.

4 groot, ferm piesangs

60 ml gekapte, vars koljander

Sap van ½ suurlemoen

30 ml botter

½ ui, fyn gekap

30 ml gerasperde, vars gemmer

1 rooi brandrissie, gekap

Knippie kaneel

Knippie kardemom

30 ml bruinsuiker

5 ml sout

180-250 ml water

Skil en sny die piesangs in blokkies. Meng dit met die vars koljander en suurlemoensap. Verhit die botter in 'n kastrol en voeg die ui, gemmer, brandrissie, kaneel en kardemom by. Braai vir 'n paar sekondes. Voeg die piesang, suiker en sout by en braai tot die suiker gesmelt is. Voeg die water by en prut tot die piesang net begin sag raak. Pas die geurmiddels na smaak aan en sit louwarm of teen kamertemperatuur voor. Lewer sowat 500 ml blatjang.

OPDIENVOORSTELLE

Elvis-broodjies

Volgens bronne kon Elvis Presley, die koning van rock, twaalf tot vyftien van dié broodjies op 'n slag verorber. En om dinge nóg geiler te maak, het hy dit in niks anders as varkvet gebraai nie!

60 ml gladde grondboontjiebotter

4 snye vars witbrood

2 klein, ryp piesangs, fyn gedruk

30 ml botter

Smeer grondboontjiebotter op twee van die snye brood en smeer fyngedrukte piesang op die ander twee. Sit opmekaar en druk effens vas. Smelt die botter in 'n pan en braai elke broodjie tot goudbruin en bros aan albei kante. Eet warm. Genoeg vir twee mense.

Landbouweekblad, 21 September 2007.