Troef die koue met koningskos

'n Beter kombinasie van 'n lekker wildsvleispastei met melktert daarby sal jy nie sommer kry nie! En vir albei gebruik jy dieselfde skilferkors.




Melktert


Dié vulsel is genoeg vir twee tertborde.



Vulsel

1 liter melk

50 ml botter

250 ml suiker

'n knippie sout

75 ml koekmeel

50 ml mielieblom

4 ekstra groot eiers, geskei

ekstra melk

'n mespunt kremetart

2,5 ml vanieljegeursel

2,5 ml karamelgeursel

2 druppels suurlemoengeursel



Stel die oond op 220 °C.

Kook melk met botter en helfte van suiker. Voeg sout by.

Maak die meel en mielieblom aan met die eiergele. Voeg van die ekstra melk by om dit meer hanteerbaar te maak. Voeg die meel-eiermengsel geleidelik by die kookmelkmengsel en bring tot kookpunt. Verwyder van stoof. Klits eierwitte tot styf terwyl die res van die suiker en kremetart bygevoeg word. Vou eierwitte met metaallepel by die melkpap in. Smeer eers die kors se rand met eierwit en skep pap in. Bak in voorverhitte oond vir sowat 10 minute, stel die oond af tot 180 °C, en bak vir 'n verdere 10 minute tot goudbruin.

Wenk: Maak seker dat jy net 2 druppels suurlemoengeursel gebruik, anders sal die tert nie lekker wees nie.




Wildsvleispastei




500 g wildsvleis

'n paar repies varkspek, na smaak

4 heel naeltjies

sowat 5 ml wonderpeperkorrels ("all spice")

5 ml gemaalde koljander (opsioneel)

sout en swartpeper na smaak

15 - 30 ml sago, geweek in

125 ml water



Laat wildsvleis oornag in asynwater lê. Giet die water af. Stowe die vleis in sowat 250 ml water (voeg meer by, indien nodig) met al die bestanddele, behalwe die sago.

As die vleis sag is, voeg sago by en roer versigtig deur. Pasop dat die sago nie aanbrand nie. Indien die sous te dik is, voeg bietjie meer water by.

Plaas in yskas om af te koel.

Stel oond op 220 °C.

Rol koue deeg uit (sien hierbo) en indien verkies, plaas 'n dun lagie onderin pasteibak. Skep vleis in en bedek weer met 'n deeglaag bo-op. Maak 'n paar gaatjies bo-op vir stoom om te ontsnap. Bak tot goudbruin bo-op.



Wenke: Vir klein pasteitjies, druk sirkels volgens verlangde grootte uit deeg, skep vleis bo-op en bedek weer met 'n sirkel deeg.

As jy vind dat die vleis té souserig is, klits die wit van 'n eier effens, voeg die sap van 'n halwe suurlemoen daarby en meng met die vleis.

Skilferkorsdeeg vir melktert en
wildsvleispastei




8 x 250 ml koekmeel

5 x 250 g margarien

500 ml yskoue sodawater

50 ml brandewyn

2 eiers, geskei

10 ml kremetart



Sif die koekmeel drie keer. Hou 250 ml van die koekmeel eenkant. Vryf 750 g margarien by die res van die meel in. Klits die sodawater, brandewyn en eiergele tot skuimerig. Voeg dit by die meelmengsel en meng goed.

* Plaas in yskas tot styf (vir sowat 1 uur). Haal deeg uit yskas en rol so dun as moontlik - sowat 1 mm dik - uit. Die deeg moet net nie breek nie. Rasper 250 g van die margarien oor die deeg. Strooi 5 ml kremetart en die helfte van die 250 ml meel (wat eenkant gehou is) oor. Rol of vou styf op.

Herhaal een keer van * en plaas weer in yskas. Laat rus in yskas vir 24 uur vóór gebruik. Die deeg vries ook baie goed.

Gebruik deeg soos verlang om tertbord uit te voer. Hou res in vrieskas en haal uit soos nodig.

Dié deeg word ook vir die wildsvleispastei gebruik.



27 Junie 2003