Uie-en-kaasquiche

Meng die meel en sout in ’n bak en vryf die botter met jou vingerpunte daarby in. Voeg die kaas by en meng deur. Voeg die water bietjie vir bietjie by tot klam krummels vorm. Druk die deeg goed bymekaar, draai toe in kleefplastiek en verkoel vir 30 minute. Terwyl die deeg rus, verhit die botter in ’n swaarboompan en braai die uie stadig daarin tot sag en goudbruin. Geur na smaak met sout, peper en suiker en braai tot gekarameliseer. Laat afkoel.

Voorverhit die oond tot 200 ˚C. Rol die deeg dun uit op ’n meelbestrooide oppervlak en voer vier tertborde van 10 cm of een van 26 cm daarmee uit. Voer die deeg uit met ’n vel bakpapier en vul met droë bone of rys. Bak blind vir 10 minute. Verwyder die papier en bone (of rys) en bak vir nog 5-7 minute. Haal uit die oond en verlaag die oondtemperatuur tot 160 ˚C. 

Skep ’n laag uie onder-in die tertkors(e), gevolg deur ’n lagie camembert, cheddar en emmenthal. Herhaal die lae een keer. Klits die room, eiergele, eiers, melk en geurmiddels liggies saam en giet bo-oor die kaas-en-uie-vulsel.

Maak seker die eiervla loop goed tussen die bestanddele in. Bak vir 20-25 minute (vir kleiner quiches) of 30-35 minute (vir ’n groot quiche) tot ferm en goudbruin. Sit voor met ekstra gekarameliseerde uie bo-op, indien verkies, en ’n groen slaai.

Lewer 6-8 porsies.

Landbouweekblad, 15 Oktober 2010