Praat eerder as baklei oor takswet

Die sentrale tema van die Wet op Eiendomsbelasting is kommunikasie en oorlegpleging. Agri SA wil eerder die pad van onderhandeling loop as die pad van duur toetssake in die hof, sê mnr. Johan Pienaar, direkteur van ekonomie en handel by Agri SA.

Hy sê dit is belangrik dat boere op plaaslike vlak strukture, soos 'n belastingforum, moet stig waardeur daar tydig met munisipaliteite onderhandel kan word. Die wet verplig munisipaliteite om met die gemeenskap oor hul belastingbeleid te onderhandel.

Hy sê van die 280 munisipaliteite word 136 as riskant beskou. Die wet laat toe dat dié met gebrekkige inkomste en vermoë belasting op landbou-eiendomme kan hef.

Dienste wat boere self voorsien, moet in ag geneem word. Pienaar sê die regte benadering sal waarskynlik wees om te sê: "Ons kry beperkte dienste, maar ons is bereid om bekostigbare en billike belasting te betaal om die munisipaliteit te help finansier," eerder as om te sê: "Ek kry geen dienste nie en ek weier om te betaal".

"Agri SA sal op nasionale vlak sy bes doen om beleid tot voordeel van die boere te beïnvloed, maar sy personeel kan nie op plaaslike vlak betrokke raak nie. Boere sal self moet bepaal wat die ekonomiese bydrae van die landbou in hul omgewing is, watter dienste hulle ontvang en watter dienste aan hul werkers gelewer word. Dit alles het 'n invloed op die koers wat bepaal kan word."

Eiendomsbelasting sal oor 'n tydperk van vier jaar ingefaseer word. Pienaar raai boere aan om 'n databasis oor die landbou in hul omgewing in te stel sodat dit in onderhandelinge ingespan kan word.

10 Junie 2005