Probleme met onwettige saad

Die onwettige handel in saad was 'n belangrike onderwerp op die onlangse wêreldkongres van die Internasionale Saadfederasie (ISF) in Christchurch, Nieu-Seeland. Regsoptrede teen oortreders in Suid-Afrika is daar bespreek.

Daar is onder meer verwys na optrede teen boere in Mpumalanga wat na bewering by die onwettige teling en verkoop van mieliesaad betrokke was.

Mnr. Deon van Rooyen, Pannar Saad se besturende direkteur en voorsitter van die ISF, sê die onwettige vermeerdering en handel in beskermde plantkultivars en verwante tegnologie het in 'n groot probleem in talle lande, Suid-Afrika ingesluit, ontwikkel.

"Dit benadeel belegging deur die private sektor in navorsing en plantteling op sekere gewasse, wat weer 'n ongunstige uitwerking op die landbouproduktiwiteit en produksie van wetsgehoorsame boere uitoefen."

Die toepassing van bestaande wetgewing en regulasies om intellektuele eiendomsreg te beskerm, is 'n groot leemte. Van Rooyen sê die internasionale saadbedryf en nasionale saadorganisasies is besig met 'n groot poging om oplossings op lang termyn vir die probleem te vind tot voordeel van die landboubedryf. Dit geskied deur 'n proses van kommunikasie, opvoeding en interaksie met boere en hul bedryfsorganisasies. As laaste uitweg word daar teen oortreders opgetree.

Hy sê in die lig van die moontlike impak van klimaatsveranderinge op die verbouing van landbougewasse is die bydrae van plantteling vandag meer belangrik as ooit om te verseker dat verbeterde kultivars deurlopend ontwikkel en beskikbaar gestel word.

Landbouweekblad, 29 Junie 2007