Proefplaas vir mentors

Die Sydenham-proefplaas van die Vrystaatse Universiteit se departement natuur- en landbouwetenskappe word in 'n instelling omskep wat opleiding en mentorskap aan kleinskaalse en opkomende boere sal lewer.

Dit sal boere insluit wat ingevolge die grondherverdeling-program gevestig is.

Prof. Herman van Schalkwyk, dekaan, sê dit word die fakulteit se strategiese plan ingesluit om die deurlopende proses van hervorming in Suid-Afrika te ondersteun.

Die herontwerp van die proefplaas spruit uit 'n driesydige samewerkingsooreenkoms wat die fakulteit binnekort met die National African Farmers' Union (Nafu) en die plaaslike munisipaliteit Mangaung gaan sluit.

Opleiding in onder meer braaihoender- en eierproduksie, en melk-, vark- en skaapboerdery sal voortaan op Sydenham gegee word. Die doel is om 'n omvattende pakket vir klein- en opkomende boere, asook die plaaslike gemeenskap te bied.

Leerlingskappe word in die vooruitsig gestel sodat die nuwe studente vaardighede kan bekom waarmee hulle vir hulself kan werk skep.

Sydenham is sowat 12 km buite Bloemfontein, langs die pad na Reddersburg. Dit is die universiteit se oudste proefplaas. Stedelike uitbreiding het meegebring dat plakkershutte deesdae tot digby die grensdraad strek.

Van Schalkwyk sê die inwoners van dié informele nedersetting — Mangaung Fase II — is 'n primêre mikpunt van die nuwe projek.

Die fakulteit hoop ook om met die projek 'n diens aan die Vrystaatse boeregemeenskap te lewer en dit later na ander provinsies uit te brei. Sowat 40 afgevaardigdes het reeds 'n gesamentlike inligtingsessie vir die Vrystaatse, Noordwes- en Oos-Kaapse wetgewers op die plaas bygewoon.

Dr. Léan van der Westhuizen, Sydenham se bestuurder, sê hulle hoop om vanaf begin volgende jaar volskaals kursusse daar aan te bied. Die universiteit, munisipaliteit, Land Bank, Departement van Landbou en buitelandse skenkers het reeds geld bewillig.

Die fakulteit kon Sydenham die afgelope paar jaar nie ten volle benut nie en die plaas was in 'n stadium geoormerk om verkoop te word. Die nuwe rigting wat nou daarmee ingeslaan word, bied egter geleenthede wat dié plan van die tafel gevee het.

12 November 2004