Proteas pronk in sybokhaar

Die Protea-krieketspan, wat pas die nommer een-posisie in internasionale eendag-krieket ingeneem het, sal binnekort in modieuse ontwerper snyerspakke wat uit sybokhaar vervaardig is, kan pronk.

Die materiaal wat uit 60% sybokhaar en 40% wol bestaan, is deur Miyuki in Japan geweef. Sybokhaar Suid-Afrika het die materiaal vir die projek geskenk.

Mnr. Reinholdt du Randt, voorsitter van SSA, sê die borgskap wat sowat R400 000 beloop, kon nie op 'n meer geleë tydstip gekom het nie aangesien die Proteas nou die onbetwisbare wêreldkampioen in eendag-krieket is. "Ons sou graag ook by Suid-Afrikaanse wêreldbekersokkerspan betrokke wou raak, maar dit is bykans onmoontlik om met die tipe geld wat ons vir die doel beskikbaar stel, met Fifa te onderhandel."

Du Randt meen dat 'n groot slag vir Suid-Afrikaanse bokhaar met die borgskap geslaan is. SSA beplan om foto's en ander beeldmateriaal waar die Proteas die klere dra, wêreldwyd bekend te stel. "Ons gaan alles moontlik doen om die maksimum voordeel daaruit te trek," het hy gesê.

Die bekende ontwerper van mansklere, mnr. Christiaan Erasmus, wat sy klere onder die CEE-etiket bemark, was die week in die Baai om die mate van die Proteas en die spanbestuur te neem. Die pakke sal in Istanbul, Turkye opgemaak, en binne ses weke aan die span oorhandig word. Die pakke sal by alle formele geleenthede gedra word.

15 April 2009