'Rand behoort nie te bokspring'

Die rand behoort in die nabye toekoms tussen R8 en R9 per Amerikaanse dollar te beweeg, meen dr. Cees Bruggemans, hoof-ekonoom van Eerste Nasionale Bank.

Die Suid-Afrikaanse geldeenheid behoort nie buitensporig te versterk of te verswak nie, sê hy.

Bruggemans, wat die hoofspreker op 'n ENB-otnbyt op die Nampo-Oesdag buite Bothaville was, glo die wêreldwye ekonomiese krisis is reeds iets van die verlede, en dat ekonomiese herstel, beide plaaslik en internasionaal, reeds teen so gou as die vierde kwartaal vanjaar al kan begin.

Hoewel die media nog daagliks vol is van negatiewe ekonomiese data, is dit blote reaksie op die krisis. Tekens van stabilisasie is reeds op wêreldmarkte en in Suid-Afrika te sien, het Bruggemans gesê.

Die ekonomiese herstel sal die groeiende vraag na landbouprodukte opnuut aanvuur. Tekens daarvan is reeds in die beweging van kommoditeitpryse te bespeur, het hy gesê. Die afgelope ses maande is daar ook al besliste tekens dat beleggergeld na die ontluikende markte begin terugkeer.

13 Mei 2009