Rand effens swakker, maar ?

Nie veel swakker rand verwag

Die rand kan in die volgende jaar of twee binne 'n band van R6 tot R7 teenoor die Amerikaanse dollar verhandel en kan moontlik tot so laag as R8 verhandel.

Mnr. Christo Luüs, hoofekonoom van Absa, het op die konferensie van AMT en Landbouweekblad vir die vooruitskouing in die landbou in Pretoria gesê boere moet nie 'n skerp verswakking in die rand verwag nie. Luüs sê Suid-Afrika lyk goed in die oë van buitelandse beleggers nadat 'n opgradering in sy risiko-profiel bekom is. Dit bring mee dat heelwat buitelanders op die plaaslike aandelemark kom belê en die groot invloei van buitelandse geld kan 'n sterker geldeenheid meebring. 'n Sterker geldeenheid word in die algemeen as ongunstig vir boere beskou omdat dit die plaaslike prys van kommoditeite — wat van internasionale pryse afgelei word — verlaag.

Hoewel die sterker geldeenheid sover tot beter vooruitsigte vir ekonomiese groei bydra — onder meer weens laer inflasie en gevolglike laer rentekoerse — waarsku Luüs oor die hoër oliepryse. Hy sê Absa se ekonomiese ontleding toon as die olieprys tot $100 per vat opskiet en vir 'n hele ruk daar verhandel, kan dit tot 'n styging van 3 % tot 4 % in die rentekoers lei.

Hy sê nietemin verwag die bank dat die rentekoers die volgende twee jaar 'n hoogtepunt van 11,5 % kan bereik en 12 % teen einde 2007.

Volgens hom kan die koersverhogings meegebring word deur 'n hoër olieprys en 'n moontlike hoër petrolprys wat inflasionêr kan wees.

Hy verwag wel dat inflasie in die volgende jaar binne die Reserwebank se mikpunt van 3 % tot 6 % sal wees, maar dat die monetêre beleid waarskynlik opgeskerp sal wees as dit blyk dat dié mikpunt oorskry sal word.

12 Augustus 2005