Rawsonville-leuens: Niemand nog gestraf

Byna 'n jaar nadat vier Rawsonville-boere valslik van die verkragting van 'n plaaswerker-vrou beskuldig is, het geregtigheid nog nie geseëvier om die sondaars aan die pen te laat ry nie.

Adv. Nicolette Bell, adjunk-direkteur van openbare vervolging (DOV), het gesê sy het meer as 'n maand gelede reeds 'n beslissing gemaak. Die lêer is egter nog by adv. Rodney de Kock, Wes-Kaapse DOV, vir goedkeuring.

De Kock was nie vir kommentaar beskikbaar nie.

Me. Annalien Davids het beweer sy is op 30 April 2006 deur vier boere en 'n plaaswerker verkrag. Haar 15-jarige vriend, Anthony Ntonzeni, is glo met 'n ysterstaaf aangerand en sy hande met sy skoenveters vasgebind. Hy is ook glo agter 'n bakkie deur 'n rivier gesleep.

Davids het later erken alles was leuens om "die boere se plase en geld" te bekom. Sy is deur die organisasie Women on Farms aangevuur om voet by stuk te hou.

Die onafhanklike klagte-direktoraat het in 'n verslag, wat aanvanklik van die media weerhou is, aanbeveel insp. Matthew Ntshanga van die Ceres SAPD moet vir regsverydeling aangekla word. Davids en 'n vriendin, me. Beverly van Rooyen, moet volgens dié verslag ook vir meineed en regsverydeling aangekla word.

Die DOV moes 'n beslissing hieroor maak, maar sloer reeds maande lank.

Een van die boere, wat anoniem wil bly, sê hy wil antwoorde hê.

"Die waarheid is reeds uit, maar daar word steeds vrae gevra. Die skuldiges moet in die hof uitkom."

Mnr. Carl Opperman, hoof-uitvoerende beampte van Agri Wes-Kaap, sê hulle het 'n "wye, indringende gesprek met die menseregtekommissie (MRK) gehad oor onder andere Rawsonville.

"Ons het baie hard en duidelik gesê ons het na die MRK gegaan om hulp te kry om die saak op te los sodat ons weer 'n gebalanseerde samelewing kan hê. Ons wag om te sien wat vorentoe gaan gebeur."

4 Oktober 2007