Re

Die wydverspreide reën wat oor groot dele van die land geval het, het reeds daartoe gelei dat vleispryse begin styg het. Na verwagting sal dit met die aanloop tot Kersfees verder verbeter.

As meer reën val, sal vleisboere in 'n baie beter posisie as 'n jaar gelede wees.

Mnr. Chris Troskie, hoofbestuurder van CMW se lewende hawe afdeling, sê hoewel lampryse 'n maand gelede ook goed was, het groot invoer vanuit Namibië en die knellende droogte druk op die mark geplaas. "Ná die afgelope week se reën het die prys van lamvleis aan die haak van R23,50/kg tot sowat R25,50/kg gestyg en is daar aanduidings dat dit verder sal verbeter."

Troskie meen dat speenkalfpryse ook weer in die nuwe jaar sal styg. "Ek is oortuig dat as nog meer reën val, vleisboere volgende jaar 'n goeie seisoen sal beleef. Ligte speenkalwers se prys kan dan R8/kg op die hoef wees."

Mnr. Gawie Kleinhans, hoofbestuurder van BKB se afdeling vir die bemarking van vee, sê lammers behaal reeds tot R27/kg, terwyl ou ooie teen nagenoeg R18/kg verkoop. Graad A-beesvleis verhandel teen gemiddeld R13,76/kg en ou koeie tot R11/kg aan die haak. Die pryse sluit nie BTW in nie.

As die goeie vleispryse gehandhaaf word en graanpryse verder daal, meen hy dit kan graanboere noop om hul kuddes te vergroot eerder as om die graan te bemark.

Mnr. Gary Moorcroft, besturende direkteur van die Oostelike Provinsie Lewendehawe Agentskap in Port Elizabeth, sê terwyl boere kan glimlag oor die pryse wat hulle ontvang, die verwerkingsbedryf tans in 'n groot krisis verkeer. "Ons sit met 'n siek bedryf. Aan die een kant het boere die voordeel dat die groot aantal abattoirs in die land goeie mededinging verseker, terwyl die sterk rand tot gevolg het dat vleis makliker ingevoer kan word."

Moorcroft sê die R17/kg wat vir varkvleis betaal word, is die hoogste prys nog. Ook boerbokke en angoras wat uit die hand verkoop word, behaal uitstaande pryse.

17 Desember 2004