'Regering sal moet pa staan'

Die emosie onder boere rondom plaasmoorde en die bedreiging van eiendomsreg kan in só 'n mate oorspoel dat dit helder denke oorheers. "Dít sal ons voor die deur van die staat lê weens die manier waarop die misdaadsituasie in die land bestuur word," het mnr. Paul van der Walt, voorsitter van die TLU SA, gesê.

Hy sê die grusame moorde onlangs op die egpaar Botha is niks anders as terreur nie.

"Die wyse waarop die egpaar voor teregstelling mishandel en gemartel is, is 'n totaal nuwe wending in plaasmoorde."

Volgens die SA Polisiediens in Limpopo is niemand nog in hegtenis geneem vir die moorde nie.

Die TLU SA sê die sluiting van die kommando's en die ondoeltreffendheid van sektorpolisiëring het geleenthede geskep waarin misdadigers gedy.

In sommige gebiede is die aanduiding dat misdaad met tot 400 % toegeneem het ná die sluiting van die kommando's.

"Toe pres. (Thabo) Mbeki die aankondiging gemaak het, het die TLU SA gewaarsku dat dit gaan gebeur.

"Van die politici se beloftes dat daar geen gaping tussen die sluiting van die een en die instelling van die ander struktuur sal wees nie, het niks van gekom nie."

Regsoptrede oor die veiligheidsituasie geniet deurlopende aandag van die organisasie en bepaalde regsmenings is reeds daaroor ingewin.

Van der Walt sê optrede op ander terreine verg ook aandag, soos die feit dat misdadigers die beste gesondheidsorg geniet as hulle tydens inhegtenisneming beseer word, terwyl slagoffers aan eie genade oorgelaat word.

"Die TLU SA is besig met indringende samesprekinge op seniorvlak met die SAPD en 'n het afspraak met die Minister van Veiligheid en Sekuriteit is 'n voorrangsaak. As dit nodig is, ook met pres. Mbeki," het Van der Walt gesê.

24 Februarie 2006