SA arbeidsre

SA arbeidsomgewing nie rigied — kenner

Suid-Afrikaanse werkgewers kan regtig nie kla dat die arbeidsomgewing té rigied en onbuigbaar is nie. In teendeel — as gekyk word na die groot toename in tydelike arbeid wys dit werkgewers het in 'n mate aangepas.

Só sê prof. Guy Standing, 'n Britse spesialis van arbeid en ekonomie wat deur mnr. Membathisi Mdladlana, Minister van Arbeid, aangestel is om die Suid-Afrikaanse arbeidsbeleid te ondersoek en te kyk of dit buigbaar genoeg is om tot werkskepping by te dra.

Hy het 'n voorlegging aan die parlementêre portefeuljekomitee vir arbeid gedoen. Die volledige verslag oor arbeid in Suid-Afrika sal glo in Junie aan die Minister oorhandig word. Dit bevat 'n breedvoerige hoofstuk oor arbeid binne die landbou.

Standing sê met die ontwikkeling van die plaaslike arbeidsbeleid moes sleutelfaktore, soos die buigbaarheid van die arbeidsmark en die insluiting van lae inkomstegroepe, oorweeg word.

Hy meen egter die armste mense het aan die kortste ent getrek. Met die ontwikkeling van 'n buigsame arbeidsmark, moes 'n struktuur vir die beskerming van lae inkomstegroepe opgestel word. Dit het nie gebeur nie en sedert 1996 lyk dit vir hom asof "die stem van die kwesbare mense" ál dowwer word.

In China en Indië, net soos in Suid-Afrika, woed dieselfde debat of hul arbeidsmark té rigied gereguleer is. In dié lande meen hulle dié faktor is die oorsaak vir groei sonder werkskepping — 'n siening wat ook in Suid-Afrika posgevat het. "Te veel mense in Suid-Afrika wil die beeld skep dat 'n onbuigbare arbeidsbeleid bestaan. Dit is skadelik."

Kwesbare groepe moet weer ingesluit word, want dit is ál hoe maatskaplike en ekonomiese regte en produktiwiteit verbeter kan word, sê hy.

Mnr. Thembinkosi Mkalipi, senior uitvoerende bestuurder van arbeidsverhoudinge by die Departement van Arbeid, sê sy departement se hersiening van plaaswerkerlone volgens die sektorale vasstelling het begin en moet teen Maart volgende jaar voltooi wees. Die huidige vasstelling wat oor drie jaar strek, loop eersdaags ten einde.

Landbouweekblad, 18 Mei 2007