SA kan grond-doelwit mis

Die Departement van Landbou en Grondsake benodig R74 miljard meer oor die volgende vyf jaar om sy doelwit om 30% van die landbougrond in Suid-Afrika teen 2014 te herverdeel te bereik. Die departement het dié versoek aan die Nasionale Tesourie gerig en sê dat stygende grondpryse die rede vir die behoefte is.

Daar word tans R6 miljard per jaar vir die grondhervorming begroot en die direkteur-generaal van grondsake, mnr. Thozi Gwanya, meen dat dit onder dié omstandighede tot 2025 sal neem om hul doelwit te bereik. Hy sê ook dat die Tesourie die versoek oorweeg en die punt debatteer.

Volgens Gwanya is daar geen statistieke beskikbaar wat die sukses van die plase wat na nuwelingboere oorgedra is meet nie. Die analise wat van die 521 afgehandelde projekte, en die ondersteuning wat die boere na die oorhandiging van die grond gekry het, toon net die betrokke uitdagings.

Hy meen dat een van die grootste uitdagings die soort ondersteuning wat nuwelingboere ontvang is. Die Departement van Landbou hersien tans hierdie deel van die hervormingsprogram en beoog om dit te verbeter.

Die kans is groot dat grondhervorming 'n belangrike deel van die ANC se verkiesingsveldtog vir die 2009 verkiesing sal uitmaak en die party se sekretaris-generaal, mnr. Gwede Mantashe, is uitgesproke oor die feit dat herverdeling van grond om doelwitte te bereik nie ideaal is nie. Hy meen dat nuwelingboere die soort ondersteuning moet kry wat sal verseker dat hul boerderye suksesvol is.

De Departement van Grondsake is ook besig om sy kapasiteit te verbeter deur 1 200 nuwe personeellede oor die volgende drie jaar aan te stel.

Bron:

Fin24

3 September 2008