SA melk na buurland

Suid-Afrika het tans die grootste melkoorskot in meer as 'n dekade nadat melkboere meer melk gelewer het om 'n verwagte tekort, wat nooit verwesenlik is nie, teen te werk. Die verlangsaming van die ekonomie en goedkoop invoer deur kleinhandelaars het ook tot die oorskot bygedra.

Sonnendal Dairies, 'n maatskappy in Kaapstad, verlig sy oorskot deur melk na Namibië uit te voer. "Namibië produseer sowat 70 000 liter melk per dag en ervaar altyd tekorte. Namibia Dairies is die enigste melkverwerker daar," sê mnr. Martin Swanepoel, besturende direkteur.

Sy maatskappy het in Junie vanjaar sy eerste besending melk na dié buurland uitgevoer. Hy lewer tans sowat 260 000 liter per maand. Namibia Dairies het ingestem om die Suid-Afrikaanse produsenteprys asook verwerkings- en vervoerkoste te dek. "Dit is die ideale manier vir boere om hul oorskot melk te verkoop sonder om laer pryse te aanvaar," sê Swanepoel. Onderhandelings is tans aan die gang om na ander buurlande uit te voer.

Te veel kaas

Suid-Afrikaanse melkboere sê hulle het ook tans sowat 8 000 ton kaas wat gereed is om na die Europese Unie (EU) uitgevoer te word, maar hulle word gekniehalter deur beskermingsbeleid wat as gesondheidstandaarde verdoesel word.

Mnr. Dirk Troskie, landbou-ekonoom by die Wes-Kaapse departement van landbou, sê Suid-Afrikaanse suiwelprodukte word deur talle lande aanvaar. Hy meen die EU stel sekere standaarde as 'n "meganisme om sekere produkte uit hul markte te hou".

Mnr. Cobus Dowry, Wes-Kaapse minister van landbou, sê uitvoer na buurlande kan 'n moontlike oplossing vir die probleem wees.

Bron:

IOL

Financial Mail

4 Desember 2008