SA moet uit Afrika se honger leer

As Afrikaleiers nie drasties na die landbou in hul lande omsien nie, gaan die huidige kostekort in lande noord van Suid-Afrika elke jaar vergroot en hongersnood drasties toeneem. Suid-Afrika moet daaruit leer en sorg dat sy opkomende boere op 'n kommersiële vlak kan produseer om te keer dat die druk op die oorblywende 70 % van kommersiële boere te groot is om in die voedselbehoefte te voorsien.

Mnr. Wim Alberts, die Land Bank se hoof van kleinhandel, het op Agri Noord-Kaap se kongres in Kimberley gesê as Suid-Afrika in Afrika mededingend wil wees en vergoed waar ander Afrikalande tekortskiet, moet boere en landbou-organisasies grondhervorming ernstig opneem. "Ons kan nie bekostig dat grondhervorming die land se ekonomie onder druk plaas nie."

Aanduidings uit die landbousensus is dat die ekonomiese rol van die landbou redelik vinnig afneem. Dit sal verrykende gevolge meebring in 'n tyd waar die landbou onder druk geplaas word met grondhervorming en grondeise.

Hy meen as die landbou se winsgewendheid nie tot 'n aanvaarbare vlak gebring kan word om nuwe toetreders te lok nie, sal Suid-Afrika nie in die wêreldmark kan meeding nie.

Alberts wonder of die plase wat teen 2014 herverdeel is, 'n bydrae tot die bruto binnelandse produk (BBP) sal lewer en of die landbou-infrastruktuur sterk genoeg sal wees om die oorgangsfase van intreeboer tot doeltreffende kommersiële boerdery te bewerkstellig.

"Suid-Afrikaanse boere moet hulself posisioneer om die uitwerking van dié antwoord in 2014 te hanteer." Die posisionering is deels om Suid-Afrikaanse landbou in Afrika te laat uitstyg. Organisasies moet ophou sê dat hulle die ontwikkelende landbou steun. "Ons moet kan sien waar hulle reeds die leiding geneem en 'n verskil gemaak het."

Een van die aspekte waarop gefokus word, is die ontwikkeling van vaardighede in die landbou — 'n kritieke faktor in 'n volhoubare landbousektor in Suid-Afrika.

9 September 2005