Saad is die sleutel

Die Afrika-saadhandelaarsvereniging (AFSTA) meen dat die versterking van die landbousektor en die saadbedryf in Afrika essensieel is in die stryd teen hongersnood.

Die vereniging sê dat tussen 60% en 90% van landelikes hul families deur bestaansboerdery ondersteun en dat tussen 60% en 70% van dié boere lae-opbrengs saad gebruik. Hy meen ook dat regerings in Afrika en skenkers nie die saadbedryf genoeg ondersteun nie.

Van die beperkende faktore aangaande saad is die tekort aan 'n omgewing wat die saadbedryf in staat stel om te groei, sowel as die komplikasies verbonde daaraan om sade tussen lande te vervoer.

AFSTA meen dat hy, met die hulp van sy 53 lede van 28 Afrika-lande, die landbou in Afrika kan help deur saadvoorraad te verbeter en deur 'n omgewing te skep waar produsente van hoë kwaliteit saad ondersteun word.

Die 27 saadhandelaarsverenigings wat lede van AFSTA is staan gereed om aksie te neem om voedselsekuriteit in Afrika 'n werklikheid te maak. AFSTA sê ook dat meer fondse nodig is om akkerbou te ondersteun.

5 Junie 2008