Saadmense stres saam met boere

Die sterk rand, oorproduksie van mielies en sorghum, die droogte in die produksiegebied van wintergraan en die invoer van produkte het die graansaadbedryf onder geweldige druk geplaas.

Hoewel al die maatskappye in dié bedryf uiters mededingend is, moet hulle met alle ander belanghebbendes in die landboubedryf saamwerk om nuwe markgeleenthede te skep of ander bemarkingskanale te soek om die mark uit te brei.

Mnr. Kobus Lindeque, voorsitter van die akkerbou-afdeling van Sansor, sê boere is weens swak graanpryse en voorgenoemde probleme onder geweldige druk. Hulle is ook bekommerd oor die gehalte, kiemkragtigheid en die eenvormigheid van pitgrootte van saad.

In die produksiegebied van kleingraan het saadverkope afgeneem en die ekonomies doeltreffende voortbestaan van skoonmaak- en verwerkingsaanlegte in dié gebiede is erg onder druk weens die toenemende gebruik van plaassaad.

" 'n Gekoördineerde poging deur alle betrokkenes het gelei tot die aanvaarding van 'n strategie oor plaassaad wat tot 'n wen-wen-situasie kan lei. 'n Kontraktuele ooreenkoms tussen saadverwerkers en die eienaars van planttelersregte word in die vooruitsig gestel wat voorsiening maak vir 'n vergoeding vir verlies aan tantieme in gevalle waar 'n boer plaassaad by so 'n aanleg wil laat skoonmaak of verwerk," het hy gesê.

20 Mei 2005