Saamwerk die enigste toekoms van landbou

Samewerking op alle vlakke in die landbou is noodsaaklik om te bereik wat vir almal in die bedryf algemeen aanvaarbaar is. Alle Suid-Afrikaners kry met dieselfde ekonomiese werklikhede te doen waarvoor antwoorde gevind moet word.

Mnr. Louw Steytler, voorsitter van Vrystaat Landbou, het op die konferensie van die Suid-Afrikaanse Vereniging vir Landbouvoorligting in Bloemfontein gesê die sukses van grondhervorming en swart ekonomiese bemagtiging (SEB) is baie belangrik. "Net volhoubare grondhervorming en SEB sal 'n verskil vir almal in die land maak."

Volgens hom moet gevaarlike wanopvattings oor die kommersiële landbou uit die weg geruim word. "Een hiervan is dat plase te duur is. Die ekonomiese bedrywighede op 'n plaas bepaal die prys van grond. 'n Groot probleem is dat kommoditeitspryse tot 'n vlak gedaal het waar dit voor 2000 was. Vrystaat Landbou glo grondpryse gaan dieselfde pad volg."

Dié neiging kan reeds in die Benede-Oranjeriviergebied gesien word waar die winsgewendheid van die druiwebedryf onder erge druk is weens die wisselkoers van die rand.

Hy sê as die regerings in die Noordelike Halfrond nie subsidies aan boere verminder nie, sal die Suid-Afrikaanse landbou onder druk bly. Dit is daarom nodig dat alle belanghebbendes — onder meer Agri SA en Nafu — saamwerk om die werklikhede van subsidies die hoof te bied. Die versoeke van die landbou vir invoertariewe op landbouprodukte is eweneens 'n poging om die Suid-Afrikaanse landbou te beskerm.

20 Mei 2005