Satelliet kan heelwat vir boere beteken

'n Tweede satelliet wat deur die Universiteit van Stellenbosch (US) gebou gaan word, kan groot voordele vir Suid-Afrikaanse boere inhou.

Die Departement van Wetenskap en Tegnologie het saam met die US en Sunspace & Information Systems die projek bekend gestel. Dit is die eerste satelliet wat vir die Suid-Afrikaanse Regering gebou gaan word.

Volgens mnr. Bart Cilliers, uitvoerende hoof van die maatskappy Sunspace, kan die satelliet boere 'n voorsprong op internasionale markte gee.

''Suid-Afrikaanse boere ding onder meer met lande, soos Chili, mee. 'n Mens sal byvoorbeeld deur middel van die satelliet oeste kan monitor. Dit sal beteken dat die boer sal weet wanneer sy oes vir uitvoer gereed is," het hy gesê.

Hy wys daarop dat die satelliet meer omvangryke opnames oor droogtes, vloedskade, waterreserwes of veegetalle kan doen. ''Tans moet iemand in 'n motor klim en rondry om die opnames te doen. Dit kan tydrowend wees. Met die satelliet sal dit meer wetenskaplik gedoen word," het Cilliers beklemtoon.

Die satelliet sal deur die gebruik van beelde opnames doen wat dan deur kenners geïnterpreteer sal word. Volgens Cilliers sal inligting van die satelliet na 'n sentrum buite Pretoria gestuur word, waar dit verwerk en onder meer aan die landbou beskikbaar gestel sal word.

Die projek volg ná die groot sukses wat die US in 1999 met sy voorganger behaal het. Die eerste Sunsat-satelliet is destyds deur Nasa gelanseer.

Sowat R26 miljoen gaan deur die onderskeie belanghebbendes oor die volgende drie jaar in dié projek belê word.

Mnr. Mosibudi Mangena, Minister van Wetenskap en Tegnologie, sê die satelliet sal as 'n navorsingstuig dien om Suid-Afrika van inligting te voorsien om beter waarnemings van die aarde te doen.

Die satelliet sal in die tweede helfte van volgende jaar — waarskynlik van 'n duikboot in Rusland — gelanseer word.

Volgens prof. Chris Brink, rektor van die US, het Suid-Afrika reeds twee wonderwerke (ten opsigte van die demokrasie en sy ekonomie) bereik en dat dit nou dit die wetenskap se beurt is.

Die nuwe satelliet is relatief klein en bekostigbaar en sal elke vier dae oor dieselfde plek beweeg.

14 Oktober 2005