Sawit kan dalk oorleef

Dit lyk asof die Suid-Afrikaanse Wynbedryfstrust (Sawit) ná 'n stryd van meer as twee jaar dalk herfinansiering vir sy lening van R135 miljoen aan die bemagtigingsgroep Phetogo Investments kan kry.

Dié lening het die groep in 2004 in staat gestel om 'n belang in die KWV te verkry. Sawit is in 1999 - ná 'n skikking tussen die Regering en die KWV - gestig met R370 miljoen van die KWV om swart mense, veral plaaswerkers, tot die wynbedryf toegang te gee.

Amper ál die trust se geld is destyds aan Phetogo Investments geleen. Sedert Junie 2006 word 'n finansier gesoek - noodsaaklik vir die voortbestaan van die trust.

Die trust het onlangs voor die Parlement se staande komitee op openbare rekeninge (Skoor) verskyn nadat hy aanvanklik geweier het om die kontantvloeiprobleme wat hy sedert 2006 ondervind, aan die komitee te kom verduidelik.

Dagvaarding

Skoor moes Sawit dagvaar om te verskyn en om sy geldstate van die afgelope twee boekjare aan die Ouditeur-generaal te oorhandig.

Mnr. Charles Erasmus, uitvoerende hoof van Sawit, het aan Skoor gesê 'n ooreenkoms tussen die KWV en die Regering het die trust tien jaar gegun om sy mandaat ten opsigte van maatskaplike ontwikkeling en navorsing in die bedryf te vervul. Dié tyd eindig aanstaande Februarie.

Ná 'n hersiening in 2006 van hoeveel geld hy het, het Sawit besluit om herfinansiering te kry.

Dr. Thandi Ndlovu, voorsitter van Sawit, sê hulle hoop om in die volgende paar weke 'n strategiese vennootskap te sluit wat hul lenings sal herfinansier.

Ndlovu het benadruk dat die trust nie besig is om te vou nie.

Landbouweekblad, 11 Julie 2008