Senwes wil oor Vaalharts appelleer

Senwes het besluit om teen die hofuitspraak te appelleer waarin hy beveel is om Vaalharts-boere vir verlore ledebelange in hul voormalige koöperasie te vergoed.

Mnr. Johan Dique, besturende direkteur, het bevestig dat 'n aansoek om verlof tot appèl reeds by die hooggeregshof in Kimberley ingedien is.

Dique sê Senwes eerbiedig die hof en die reg, maar het ook die goeie reg om appèl aan te teken teen 'n uitspraak waarmee hy nie saamstem nie.

Die direksie glo die besluit om te appelleer is in die beste belang van ál Senwes se belanghebbendes.

Regter Steven Majiedt van die Kimberleyse hooggeregshof het Senwes vroeër vandeesmaand beveel om meer as R500 000 plus rente aan twee Vaalharts-boerderye te betaal. Dit is in ruil vir Senwes- en Senwesbel-aandele wat hulle sowat nege jaar gelede vir hul heffingfonds-belange in die eertydse Vaalharts-koöperasie ontvang het toe Senwes dié onderneming oorgeneem het.

Vaalharts-lede kon destyds kies om met hul ledebelange Senwes-aandele teen R4,50 elk te "koop", en Senwesbel-aandele teen R6 elk.

Die boere het egter betoog dat Senwes nie sy kant van die ooreenkoms nagekom het nie deurdat sy aandele nog nooit soveel werd was nie.

Majiedt het voorts bevind dat die destydse reëlingskema waarmee Vaalharts-koöperasie deur Senwes oorgeneem is, onwettig was omdat dit nie in 'n hof bekragtig is nie. Vaalharts-lede se bedankings en magtigings oor onder meer hul ledebelange het dus geen regskrag meer nie.

Die uitspraak is 'n toetssaak en open die deur vir verdere soortgelyke eise deur eertydse Vaalharts-lede teen Senwes. Sowat 160 soortgelyke sake, wat sowat R16 miljoen sonder rente verteenwoordig, is glo reeds aanhangig gemaak.

Die aansoek om appèl verleng 'n uitgerekte hofstryd wat reeds sedert 1999 duur toe sewe Vaalharts-boere eise teen Senwes ingedien het.

9 September 2005