Siberiese Huskies aan 't hol

Die nasionale kampioenskapsbyeenkoms vir sleewedrenne op grondpaaie vind vanjaar op 28 en 29 Julie in Belfast, Mpumalanga, plaas.

Die klub Snowdrift Siberians oefen al sedert April vir die byeenkoms en beoog om met sy deelname mense se aandag op die "Pets4Pets"-vereniging te fokus. Dié vereniging samel geld in vir navorsing oor kanker by honde.

"Ons wil graag 'n groter bewustheid by die publiek skep oor die erns van hondekanker en ook wat daar al reeds deur navorsing bereik is," het me. Natalie van der Merwe van die klub gesê.

Snowdrift Siberians is in 1995 gestig en het verlede jaar vir die eerste keer twee spanne vir die Suid-Afrikaanse kampioenskapsbyeenkoms ingeskryf. Die spanne het elk 'n derde plek in hul afdelings behaal.

Sleewedrenne op grondpaaie is 'n besonderse sportsoort omdat dit nie op sneeu beslis word nie. Spanne wissel van een tot agt honde wat voor 'n spesiaal ontwerpte tuig gespan word en elke span word deur 'n sleebestuurder aangevoer.

"Ons meen dat Siberiese Huskies vir meer as net vertoonhonde gebruik moet word. Die beoefening van sleery en deeglike teling verseker dat hul historiese herkoms nie verlore raak nie, maar van geslag tot geslag oorgedra word," het Van der Merwe gesê.

Vir meer inligting oor die wedren, besoek www.safss.co.za .

Landbouweekblad, 27 Julie 2007