Skog-boeredag eersdaags hier

Die Swartlandse Kleingraan Ontwikkelingsgroep (Skog) se boeredag sal dié jaar op 3 September plaasvind en die wêreldwye kredietknyp sal onder bespreking wees.

Dié welbekende boeredag word jaarliks op die Langgewens navorsingsplaas naby Moorreesburg gehou as deel van die Swartlandskou. Skog dien as 'n platform vir landbouvoorligting en -navorsing in die Swartland-distrik.

Dié jaar se hoofspreker is prof. Matthew Lester. Hy sal belangstellendes oor Suid-Afrika se posisie in die wêreldwye kredietknyp toespreek en vrae oor dié onderwerp beantwoord.

Hy sal kwessies soos belasting, rentekoerse, brandstofpryse, ekonomiese aanwysers en die vooruitsigte vir die toekoms dek. Diegene wat belangstel om deel te neem kan tussen agt en nege uur in die oggend op 3 September vir die boeredag registreer.

Die R50 registrasiefooi sluit verversings en 'n ete in en daar sal 'n kontantkroeg beskikbaar wees. Oudergewoonte sal daar ook 'n proefbesigtiging wees.

Stuur 'n e-pos aan Gert Conradie by gertc@elsenburg.com vir meer inligting oor die 2008 Skog-boeredag.

4 Augustus 2008