Statistiek oor plaasaanvalle

Statistiek oor plaasaanvalle gaan voortaan nie meer deur die Misdaad-analise Sentrum verskaf word nie. Dié funksie skuif oor na die SAPD, sê 'n woordvoerder van dié sentrum.

Die sentrum kon nie die jongste statistiek oor plaasaanvalle bekend maak nie omdat die nodige goedkeuring nie gegee is nie.

Volgens statistiek wat deur die TLU SA Noord ingesamel word, het plaasaanvalle vanjaar al 65 mense se lewens geëis in 162 aanvalle. Die meeste voorvalle was in Gauteng, waar 33 mense in 85 aanvalle dood is.

Volgens mnr. Louis Meintjes, vise-voorsitter van die TLU SA, het 47 van die aanvalle in Gauteng in die gebied van slegs twee polisiekantore, naamlik Cullinan en Kameeldrift, plaasgevind.

Benewens Gauteng was die meeste aanvalle in Noordwes (22) waartydens 7 mense dood is, gevolg deur Mpumalanga (17), waarin 9 mense gesterf het.

In die Vrystaat is 7 mense dood in 8 aanvalle, in die Wes-Kaap is 4 mense dood in 6 aanvalle en in die Oos-Kaap is 3 mense dood in 5 aanvalle.

In Limpopo en KwaZulu-Natal KZN) was daar 8 aanvalle waaartydens 1 mens in Limpopo en 2 in KZN dood is.

In die Noord-Kaap het 2 aanvalle plaasgevind waartydens 1 mens dood is en in die Suid-Kaap is 1 mens dood in 'n enkele aanval, sê die TLU SA Noord.

9 Desember 2008