Perde verkoop vir `n miljoen

Binne twee ure nadat die eerste Cape Premier Yearling-veiling in die Kaapstadse konferensiesentrum begin het, is twee perde vir R1 miljoen of meer verkoop. Foto: LUCILLE BOTHA

Op die vooraand van die gewilde J&B Met-perderesies op die Kenilworth-resiesbaan, het nóg ‘n groot perde-gebeurtenis gisteraand in die Moederstad plaasgevind.

Binne twee ure nadat die eerste Cape Premier Yearling-veiling in die Kaapstadse konferensiesentrum begin het, is twee perde vir R1 miljoen of meer verkoop. Die eerste aand van die veiling, waar 290 Suid-Afrikaanse perde onder die hamer gekom het, het sowat 2000 belangstellende kopers – ook van die buiteland - gelok.

Goeie bemarking

Dié veiling, die eerste van sy soort in die Wes-Kaap, is deur die Wes-Kaapse premier, me. Helen Zille as ‘n uitstekende geleentheid vir die provinsie beskryf. Volgens haar word meer as 80% van die land se rasegte-perde in die Wes-Kaap geteel, maar alle jaaroudvul-veilings het tot dusver in Johannesburg plaasgevind.

“Die verkope gaan buitelandse beleggings vir die provinsie en natuurlik ook Suid-Afrika beteken,” het Zille gesê oor die internasionale kopers uit sowat 13 lande wat die veiling bygewoon het.

Dis sinvol om ‘n veiling van dié aard op Suid-Afrikaanse bodem aan te bied, want dit kos sowat vyf keer minder om perde in Suid-Afrika af te rig as elders in die wêreld. Suid-Afrika spog ook met uitstekende kwarantyndienste.

“Kaapstad is boonop die enigste sone wat vry is van perdesiekte,” het Zille gesê.

Nuut

Sy het ook aangekondig dat ‘n internasionale perderesies in 2012 in die Wes-Kaap aangebied sal word. Dit word beskou as die volgende groot sportgebeurtenis ná 2010 se suksesvolle Wêreldbeker-sokkertoernooi.

“Ek is vol vertroue dat dit nie net vir ons ‘n geleentheid sal wees om te wys ons volbloedperde is nie net gelykstaande aan perde uit die res van die wereld nie, maar selfs beter.”

28 Januarie 2011