TLU SA praat oor AgriSEB en restitusie

AgriSEB moet saam met die restitusieproses beoordeel word. Dit kan nie van mekaar geskei word nie aangesien dit nie die volle prentjie sal openbaar oor waarheen die Regering met die landbousektor op pad is nie, sê die TLU SA.

'n Memorandum is aan lede beskikbaar gestel om die TLU SA se standpunte oor die aanbevelings wat pas gepubliseer is, uiteen te sit.

Dié organisasie is veral kommer oor die ideologies gedrewe uitgangspunt van die dokument, die landbou se vermoë om AgriSEB te hanteer en besluitneming ''wat op ongegronde aannames berus'' aangesien geen wetenskaplike impakstudies vooraf gedoen is nie.

Die TLU SA beoog 'n reeks streekvergaderings om die dokument en standpunte met lede te bespreek. Die eerste is op 22 November om 10:00 by die kommandokantoor op Lichtenburg, dit word gevolg deur 'n vergadering op 23 November by die Mispah-terrein, Winburg, en die laaste is op 24 November om 10:00 by Suikerbosrand, Heidelberg.

In die laaste week van November sal vergaderings in die Noord- en Wes-Kaap, asook 'n vergadering by die TLU SA se hoofkantoor in Pretoria gehou word.

Agri Noordwes hou op 21 November twee streekvergaderings in dié provisies oor AgriSEB. Die eerste is op Vryburg in die NG Kerksaal om 10:00, met 'n opvolgvergadering in Hartbeesfontein se boeresaal om 15:00.

25 November 2005