TLU SA: Vang ware waterdiewe

Die TLU SA meen boere is nie die groot sondaars wat waterdiefstal betref nie en dat me. Lindiwe Hendricks, Minister van Waterwese en Bosbou, moet haar van veralgemenings in dié verband weerhou. Mnr. Louis Meintjes, ondervoorsitter van die TLU SA, sê dat Hendricks op haar onlangse toer in die Noord-Kaap om onwettige watergebruikers te vervolg hoofsaaklik op myne afgekom het wat water onwettig gebruik.

Dié myne pomp ook besoedelde water terug in die Vaalrivier. "Boere is toenemend huiwerig om water uit die Vaalrivier te gebruik weens die hoë besoedelingsvlakke van dié stelsel," sê Meintjes. Hy meen sy moet eerder haar kragte inspan om die besoedelaars op te spoor omdat hulle dade voedselproduksie ongunstig raak.

Die TLU SA sê dat hy sy lede aanraai om binne die riglyne van die wet rakende water te hou en dan enige boer wat die wet oortree vervolg moet word sodat die reg sy loop kan neem. Die organisasie meen dat Hendricks egter nie alle boere oor dieselfde kam moet skeer nie en haar van veralgemenings moet weerhou.

"Minister Hendricks het beweer dat daar 183 miljoen kubieke meter water per jaar uit die Vaalrivier gesteel word. Sy het die insinuasie gelaat dat dit alles deur boere gesteel word."

9 Desember 2008