Tuinroete Agri betaal meevaller

Aandeelhouers van Tuinroete Agri, met sy hoofkantoor op Mosselbaai, kan eersdaags 'n meevaller van sowat R32 miljoen verwag.

Dié uitbetaling volg op Tuinroete Agri se onlangse verkoop van sy meer as twee miljoen aandele in die Pioneer Voedselgroep en 'n aandeelhouersbesluit om 'n kapitaalvermindering in die onderneming te aanvaar. Dié aandele het 'n belang van sowat 1 % in Pioneer verteenwoordig.

Die maatskappy gaan in Februarie 80 sent per aandeel in Tuinroete Agri uitbetaal aan aandeelhouers wat meer as 5 000 aandele in die maatskappy het. Aandeelhouers wat minder as 5 000 aandele besit, het tot 26 Januarie om hul aandele te verkoop of aandele te koop om hul belang op 5 000 aandele te staan te bring.

Tuinroete Agri se finansiële bestuurder, mnr. Oeloff Badenhorst, sê 'n uitbetaling van R32 miljoen is 'n "redelike aanname", maar dit sal afhang van die getal aandele wat teruggekoop word van klein aandeelhouers en die getal aandele wat klein aandeelhouers aandele opneem.

Aandeelhouers sal aandele teen R2,70 per aandeel kan koop, maar omdat hulle in aanmerking kom vir die dividend van 80 sent, betaal hulle in werklikheid net R1,90.

Tuinroete Agri het sowat 1 500 aandeelhouers, waarvan die helfte minder as 5 % van die totale aandele hou. Minstens 80 % van dié aandeelhouers is uit die landbou.

Landbouweekblad, 19 Januarie 2007