Twis oor brandstofheffing

Dit is nie waar dat die landbou nie brandstofheffings wil hê nie. 'n Breedvoerige proses van deelname is met die kwessie van die heffings gevolg, is in die Wes-Kaapse provinsiale parlement gesê.

Voorts is daar gesê dat die landbou hierdie heffings ondersteun.

Agri Wes-Kaap sê egter hy het 'n ooreenkoms met die Departement van Finansies gehad om met Agri Wes-Kaap in gesprek te tree voor 'n aankondiging oor die brandstofheffings gemaak sou word. "Dit het nooit gebeur nie," het mnr. Carl Opperman, hoofbestuurder van Agri Wes-Kaap, gesê.

Die heffings is op die provinsiale parlement se begroting deur me. Lynne Brown, die Wes-Kaapse minister van finansies, ekonomiese ontwikkeling en toerisme, aangekondig. 'n Brandstofheffing van 10 sent sal blykbaar 'n bykomende R302 miljoen per jaar vir hierdie provinsie beteken.

Die verbetering van paaie is onder meer waarvoor hierdie heffing geoormerk word.

Opperman sê dié aankondiging plaas verdere druk op die landbou dra tot die finansiële krisis in die landelike gebiede by. "Ons vind daar is geen erkenning vir die landbou se bydrae tot die bruto binnelandse produk, produksie en werkskepping nie."

Sy organisasie het 'n beroep op die provinsiale regering gedoen om die aangekondigde dieselheffing te heroorweeg.

Brown het aan lede van die provinsiale regering gesê deelname ten opsigte van die heffing moet bevorder word sodat wanneer dit deur mnr. Trevor Manuel, Minister van Finansies, na die provinsiale regering afgewentel word, daar 'n onderhandelingsproses hieroor kan wees.

1 April 2005