Varkpes se einde nog nie in sig

Sowat 37 000 varke is reeds van kant gemaak sedert Europese varkpes in die Oos-Kaap uitgebreek het en die einde is nog nie in sig.

Mnr. Simon Streicher, hoof uitvoerende beampte van die Suid-Afrikaanse Varkvleisprodusente-organisasie (Savpo), sê die virussiekte het vinnig versprei sedert dit begin Augustus uitgebreek het. Dit lyk egter of die maatreëls om besmette varke op te spoor en van kant te maak, vrugte afwerp. Savpo het ook sy volle samewerking gegee.

Die siekte is steeds tot die Oos-Kaap beperk. Streng maatreëls word langs die grens met KwaZulu-Natal en die Vrystaat getref om te voorkom dat die pes daarheen versprei.

Streicher sê dit is moeilik om die siekte uit te roei omdat tallle van die varkboere in afgeleë gebiede woon. Die hele provinsie word dus gefynkam. Selfs nadat die siekte onder beheer gebring is, sal hulle steeds vir lank 'n wakende oog moet hou.

Mnr. John Wright, nuwe voorsitter van Savpo, sê die jaarvergadering in Durban is deur besprekings oor varkpes oorheers, want dit bedreig die hele varkbedryf.

Mnr. Gavin Thompson, kenner van dieresiektes, het op die vergadering gesê die plaaslike veebedryf staar verswakkende toestande in die gesig weens die vrylike beweging van diere oor buurgrense heen. Dit kan Suid-Afrika se geloofwaardigheid in die buiteland aantas. "Ons het reeds nie meer 'n goeie rekord oor die beheer van dieresiektes nie. Die afgelope vyf jaar was daar uitbrekings van verskeie ernstige siektes," het hy gesê. 'n Sondaar is globalisering, wat ook geleenthede vir onwettige handel skep. Boonop is Suid-Afrika se dieregesondheidstelsel nie heeltemal daartoe in staat om oorgrens-dieresiektes te bestry nie.

7 Oktober 2005