Vars briesie in wynbedryf

'n Nuwe wyndruif-kultivar kan 'n beroering in die plaaslike wynbedryf veroorsaak. Dit is die eerste eiebodemse kultivar sedert 1961 toe Pinotage aan die wêreld bekend gestel is.

Boland Kelder in die Paarl het onlangs die mos van die nuwe witdruif-kultivar Nouvelle op 'n mediadag bekend gestel. Die ere-proeër was prof. Chris Orffer, wat hierdie kruising van 1958 tot 1965 uit SA Riesling en Sémillon tot stand gebring het.

Die uitsondelike kloon is geselekteer uit 'n reeks samestellings van dié twee kultivars. Dit is gedoen om die besonder aangename gras-karakter, met 'n tikkie groenrissie op die koop toe, te verkry.

Een blok Nouvelle is in 1997 eksperimenteel deur Boland Kelder by Perdeberg aangeplant. Die doel was om dit met Sauvignon blanc te versnit. Die Nouvelle word deurgaans soos Sauvignon blanc gehanteer.

Volgens mnr. Bernard Smuts, die wynmaker, het dié nuwe kultivar heelwat potensiaal en dit bring 'n ekstra dimensie in versnyding met die kelder se Sauvignon blanc.

Die kelder gaan die Nouvelle egter vanjaar as 'n enkelkultivar botteleer, juis vanweë die besondere eienskappe daarvan. Na vewagting sal sowat 300 tot 400 kissies van dié wyn beskikbaar gestel word.

Nouvelle het in 2002 'n prys op die SA Jongwynskou verower en in 2004 is dit op dieselfde skou as die beste ander kultivar aangewys.

18 Februarie 2005