Vereistes vir die teel van beeste

Om die beste resultate in beesteling te behaal, is daar ses beproefde vereistes wat 'n boer moet nakom. Dit behels die geaardheid, vrugbaarheid, gewig, bouvorm, gehardheid en melkproduksie, sê mnr. Laurie Lasater, voorste Beefmaster-beesteler van Texas in Amerika.

Hy en sy seun, Lorenzo, bedryf die bekende L Bar Beefmasterkudde in San Angelo, Texas, wat uit 1 200 beeste bestaan. Hulle is onderskeidelik die derde en vierde geslag in die beestelingbedryf. Die L Bar was die eerste keer in 1890 deur Laurie se oupa, Ed C Lasater, geregistreer. Hy was 'n bekende pionier-beesboer in Texas en die Beefmasterras is deur Laurie se pa, Tom, ontwikkel. Hy het in 1931 met teling begin en in 1941 die ras gevestig.

Lasater het op 'n Beefmasterboeredag op Nigel gepraat. Die geleentheid is deur die Beefmaster Alliance aangebied ter viering van sy 20ste bestaansjaar. Lasater sê die ontwikkeling van die L Bar-kudde is gegrond op vyf sleutelfaktore. Dit sluit in die genetiese geskiedenis van 40 jaar, getrouheid aan die ses vereistes reeds genoem, intensiewe uitskot van vroulike diere, wetenskaplike seleksie van bulle en die belangrikste, reis en leer by ander ernstige beesboere.

Lasater, wat die derde keer in Suid-Afrika is, het verskeie Beefmastertelers besoek. Baie van sy bulle en semen van sy bulle is na Suid-Afrika uitgevoer. Volgens hom het hy in Suid-Afrika van die mooiste Beefmasterbeeste gesien.

Op sy landgoed het hy 'n teelseisoen van 60 dae ingestel. Elke vers kalf op dieselfde tyd as haar moeder en ouma. Elke dier wat moeilik is om te hanteer, word uitgeskot, insluitende diegene wat nie die mas opkom nie.

Foto deur Hans Lombard. Storie volg:
Op die Beefmaster Allianceboeredag is van links: Jannie Ungerer, Balfour, vise-president van die Beefmaster-beestelersgenootskap, Manny da Costa van die Manjoh Ranch en lid van die Beefmaster Alliance, Laurie Lasater van die Beefmaster L Bar Ranch, Texas, VSA en Dawie Fourie, bestuurder voerkrale van Bayer Dieregesondheid.

25 Augustus 2006